शिवाजी महाराजांमुळे भारत राहिला हिंदूबहूल

विष्णू कोकजे : गजानन मेहेंदळे यांच्या ''छत्रपती शिवाजी महाराज झाले नसते तर...'' या पुस्तकाचे प्रकाशन

पुणे : ‘‘शिवाजी महाराजांनी परिवर्तन घडवले, हिंदवी स्वराज्याची स्थापना केली. लोककल्याणकारी राज्याची संकल्पना मांडणाऱ्या छत्रपती शिवाजी महाराजांमुळे भारत हिंदूबहूल राहिला आहे. अनेक देशांवर झालेल्या इस्लामिक आक्रमणामुळे ते देश मुस्लीम झाले आहेत, असे स्पष्ट प्रतिपादन माजी न्यायमूर्ती व विश्व हिंदू परिषदेचे आंतरराष्ट्रीय अध्यक्ष विष्णू कोकजे यांनी केले.

ज्येष्ठ शिवचरित्रकार गजानन भास्कर मेहेंदळे यांच्या ‘छत्रपती शिवाजी महाराज झाले नसते तर...’ या पुस्तक प्रकाशन समारंभात ते बोलत होते. यावेळी माजी खासदार प्रदीप रावत व लेखक मेहेंदळे उपस्थित होते.

कोकजे म्हणाले, ‘‘महाराजांचा आणि मराठ्यांचा सत्य इतिहास समाजासमोर आला पाहिजे. अनेक जण सध्या चुकीचा इतिहास समोर आणत आहेत, त्यासाठी सत्य समोर आणले गेले पाहिजे. महाराजांच्या गनिमी काव्याचे आज परदेशातही शिक्षण दिले जाते. इंग्रजांविरुद्ध लढणाऱ्या क्रांतिकारकांचे देखील छत्रपती शिवाजी महाराज हेच प्रेरणास्थान होते.’’

मेहेंदळे म्हणाले, ‘‘इतिहासाबद्दल खोटे, दिशाभूल करणारे लेखन खोडून काढले पाहिजे. त्यासाठी पुराव्यानिशी सत्य समोर आणलेच पाहिजे. सध्याच्या पाठ्यपुस्तकात देखील असत्य लेखन प्रसिद्ध केले जात आहे. त्याचे देखील खंडन केले पाहिजे. मोगलांनी हिंदू अस्मिता संपवण्यासाठी अनन्वित अत्याचार केले आहेत, त्याचे असंख्य पुरावे, आधार आहेत. ते समोर आणले तर खरा इतिहास समोर येईल.’’

प्रदीप रावत यांनीदेखील इतिहासाच्या विकृतीकरणाचा समाचार घेतला. केवळ व्यक्ती संपून चालणार नाही तर जुलूम करणारी विकृत प्रवृत्ती, वाईट विचारसरणी संपवली पाहिजे. शांततापूर्ण सहजीवन इस्लाममुळे शक्य झालेले नाही, अशा अहिष्णू प्रवृतीशी लढा द्यावाच लागेल, असे त्यांनी सांगितले. सुधीर थोरात यांनी प्रास्ताविक केले. नीलेश धायारकर यांनी सूत्रसंचालन केले. विक्रम बर्गे यांनी आभार मानले. कार्यक्रमाचे आयोजन विवेक विचार मंच आणि श्री शिवशंभू विचार दर्शन या संस्थांनी केले होते.

------