सलगच्या सुट्ट्यांमुळे फिरायला चालले अन् मुंबई-पुणे एक्सप्रेसवर वाहतूक कोंडीत अडकले

लोणावळा व खंडाळा शहरात देखील मोठी वाहतूककोंडी झाली होती

लोणावळा : शनिवार व रविवारच्या सलग सुट्टयांचा आनंद घेण्यासाठी हजारोंच्या संख्येने मुंबईकर पर्यटक खाजगी प्रवासी वाहनांमधून लोणावळा खंडाळा, महाबळेश्वर, कोल्हापूर भागात निघाल्याने आज सकाळपासून मुंबई पुणे एक्सप्रेस वेवर मोठी वाहतूक कोंडी झाली आहे.

मुंबई पुणे मार्गावरील ही वाहतूककोंडी सोडविण्यासाठी खंडाळा महामार्ग पोलिसांकडून मुंबईच्या दिशेने जाणारी वाहने खंडाळा बोगद्याजवळ काहीकाळ थांबवून धरत लोणावळ्याच्या दिशेने येणार्‍या वाहनांसाठी सर्व सहा लेन खुल्या केल्या जात होत्या. तरी देखील वाहनांच्या पुणे मार्गिकेवर लांबच लांब रांगा पहायला मिळत होत्या. लोणावळा व खंडाळा शहरात देखील मोठी वाहतूककोंडी झाली होती