३० जानेवारीला एल्गार परिषद घेणारच

लोकमत न्यूज नेटवर्क

पुणे : “धर्म, जाती याऐवजी अन्न, वस्त्र, निवारा, आरोग्य, शिक्षण या मुलभूत गरजांभोवती राजकारण फिरावे, या हेतूने आम्ही काम करीत आहोत. हा संदेश देशभर जाण्यासाठी एल्गार परिषद आयोजित केली होती. परंतु, ब्राह्मण्यवाद्यांनी या परिषदेला बदनाम केले. आम्ही मागे हटणार नाही. येत्या ३० जानेवारीला एल्गार परिषद घेण्याचे आम्ही ठरवले आहे,” असे निवृत्त न्यायमूर्ती बी. जी. कोळसे पाटील यांनी सांगितले.

“पोलिसांनी परवानगी नाकारली तर आम्ही रस्त्यावर ही परिषद घेऊ,” असेही कोळसे पाटील म्हणाले. गुरुवारी (दि. ३१) पत्रकार परिषदेत ते बोलत होते. पुण्यातील गणेश कला क्रीडा मंच येथे ३१ डिसेंबरला एल्गार परिषदेचे आयोजन केल मात्र पोलिसांनी परवानगी नाकारली. त्यामुळे एल्गार परिषदेची नवी तारीख पत्रकार परीषदेत घोषीत करण्यात आली. लाल सेनेचे गणपत पिसे, बहुजन एकता परिषदेचे किशोर कांबळे यांच्यासह विविध संघटनांचे कार्यकर्ते यावेळी उपस्थित होते. एल्गार परिषदेला राज्यातील अडीचशे संघटनांचा पाठिंबा असल्याचे सांगण्यात आले.

कोळसे पाटील यांनी सांगितले की, अन्न, वस्त्र, निवारा, आरोग्य, शिक्षण या मुलभूत गरजांपासून ब्राह्मण्यवादी आणि भांडवलवादी आम्हाला दूर ठेवतात. हे सर्वदूर जावे. भीमा-कोेरेगावच्या लढाईला दोनशे वर्षे पूर्ण झाल्याबद्दल २०१७ मध्ये एल्गार परिषदेचे आयोजन केले होते. या परिषदेचा आणि नक्षलवाद्यांचा काही संबंध नसतानाही एल्गार परिषदेला बदनाम करण्यात आले. एल्गार परिषदेतून देशभरात संदेश गेला होता. आमची विचाराशी बांधिलकी आहे. त्या हेतूनेच आता ३० जानेवारीला एल्गार परिषद होईल.

चौकट

कोळसे पाटील म्हणाले

-माझ्याविरुद्ध सर्च वॉरंट घेण्याचा प्रयत्न होता पण तो यशस्वी झाला नाही. ‘एनआयए’सह अनेक संस्थांनी तपासणी केली. त्यांच्या हाती काही लागले नाही.

-‘काँग्रेस-राष्ट्रवादी’नेच आपल्याला तीनदा अटक केली होती.

-एल्गार परिषदेनंतर फडणवीस सरकारने आपल्याला पोलीस सरंक्षण दिले होते. महाविकास आघाडीचे सरकार येताच ते सरंक्षण काढून घेतले गेले.

-सरकार कोणाचेही आले तरी सर्व सरकारी संस्था मनुवादी विचारांनीच ग्रासलेल्या आहेत.