वर्षभरांतरही श्रीक्षेत्र भीमाशंकर येथील व्यवहार ठप्पच

तळेघर : राज्य शासनाने कोरोनाच्या पार्श्वभूमिवर श्री क्षेत्र भीमाशंकर मंदिर उघडण्यास काही अटींसह परवानगी दिली. मात्र राज्यामध्ये दिवसेंदिवस कोरोनाबाधितांची संख्या वाढत असल्याने देवदर्शनासाठी भाविकांची संख्या कमी होवून मंदिर परिसरामध्ये शुकशुकाट आहे. त्यामुळे येथील व्यवहार ठप्प झाल्याचे चित्र पाहायला मिळत आहे.

बारा ज्योतिर्लिंगांपैकी एक असलेल्या श्री क्षेत्र भीमाशंकर मंदिरात पवित्र शिवलिंगाच्या दर्शनासाठी नेहमी भाविक, पर्यटकांची गर्दी होत असते. याशिवाय भीमाशंकर अभयारण्यातील नागफणी पॉईंट, गुप्त भीमाशंकर, हनुमान तळे, मुंबई पॉईंट, भाकादेवी पाॅईंट कोंढवळ धबधबा, गोहे पाझर तलाव, डिंभे धरण, आहुपे आदि पर्यटनस्थळांवर देखील नागरिक, पर्यावरणप्रेमी व निसर्गप्रेमी भेट देतात. महाशिवरात्री नंतर श्री क्षेत्र भीमाशंकरला देशाच्या कानाकोपऱ्यातून लाखो भाविकभक्त निसर्गप्रेमी व पर्यटक मोठ्या प्रमाणात गर्दी करतात. विशेषत: होळी, धुळवड या सणांनिमित्त मोठ्या प्रमाणात गर्दी होते. मंदिर परिसरातील बेल-फुल, माळ, रूद्राक्ष, डोलीवाले, वनस्पती औषधे, खेळणी, हॉटेल, लॉज आदी ५५० व्यवसाय येथे आपला चरितार्थ चालवितात. परंतु मागील वर्षापासून कोरोनामुळे येथील व्यवसायावर गदा आली आहे. ऑक्टोबर महिन्याच्या सुमारास हॉटेल, लॉज आदी चालू करण्यास व मंदिर उघडण्यास राज्य शासनाने काही नियम व अटींसह परवानगी दिली. सर्व सुरळीत चालू असतानाच पुन्हा कोरोना विषाणूचा प्रादुर्भाव पुन्हा वाढू लागल्याने भाविक, पर्यटकांची संख्या कमी होऊन येथील परिस्थिती ‘जैसे थे’ अशीच झाली आहे.

दरवर्षी या ठिकाणी देवदर्शन व पर्यटनासाठी मुंबई, पुण्यासह इतर राज्यांतून देखील लाखो भाविक पवित्र शिवलिंगाचे दर्शन घेण्यासाठी येत असतात. त्यातुन येथील व्यावसायिकांचे अर्थाजन चालते. परंतु सध्या राज्यात कोरोनाबाधितांची संख्या दिवसेंदिवस वाढत असल्याने भाविकभक्त व पर्यटकांनी भीमाशंकरकडे पाठ फिरवल्याने याचा व्यावसायिकांना चांगलाच फटका बसला आहे.

--

कोट

आठ ते नऊ महिन्यांनंतर शासनाने कोरोनाच्या पार्श्वभूमीवर श्री क्षेत्र भीमाशंकर मंदिर उघडण्यास काही अटींसह परवानगी दिली. मात्र राज्यांप्रमाणे पुणे जिल्ह्यात दिवसेंदिवस कोरोनाबाधितांची संख्या वाढत असल्याने देवदर्शनासाठी येणाऱ्या भाविकांची संख्या कमी होवू लागली आहे. दिवसभरामध्ये अवघे शंभर ते दीडशे भाविक दर्शनासाठी येत असल्यामुळे त्याचा परिणाम स्थानिक छोट्या मोठ्या व्यवसायावर झाला आहे. व्यवसायिकांना दिवसदिवस एकाही रुपयाची विक्री होत नाही. त्यामुळे कुटुंबाचा उदरनिर्वाह कसा चालणार, अशी चिंता त्यांच्यापुढे उभी राहिली आहे.

- वेदमूर्ती मधुकरशास्त्री गवांदे,

ज्येष्ठ सहकार्यकारी विश्वस्त श्री क्षेत्र भीमाशंकर देवस्थान _

--

फोटो २७ तळेघर भीमाशंकर

- श्रीक्षेत्र भीमाशंकर येथे भाविकभक्तांविना असलेला शुकशुकाट.