व्यावसायिक अभ्यासक्रमांच्या प्रवेश पूर्वपरीक्षेसाठी अर्ज करण्यास मुदतवाढ

ही पूर्व परीक्षा १६, १७ आणि १८ जुलैदरम्यान ऑनलाईन माध्यमांद्वारे होणार आहे, अशी माहिती 'पेरा'चे अध्यक्ष डॉ. मंगेश कराड यांनी दिली.

डॉ. मंगेश कराड म्हणाले, की खासगी विद्यापीठांतील इंजिनिअरिंग, बायोइंजिनिअरिंग, मरिन इंजिनिअरिंग, डिझाइन, फाईन आर्टस्, फूड टेक्नॉलॉजी, फार्मसी, व्यवस्थापन, शिक्षण, आर्किटेक्चर, लॉ आणि हॉटेल व्यवस्थापन या विविध व्यावसायिक अभ्यासक्रमांच्या प्रथम वर्षाच्या प्रवेशासाठी ही सीईटी घेण्यात येत आहे. या सीईटी परीक्षेच्या ऑनलाइन नोंदणीसाठी आता १२ जुलैपर्यंत विद्यार्थ्यांना अर्ज करता येणार आहे. अधिक माहितीसाठी विद्यार्थ्यांनी www.peraindia.in या अधिकृत संकेतस्थळाला भेट द्यावी, असे आवाहन त्यांनी केले.

या सीईटीद्वारे विद्यार्थ्यांना एमआयटी आर्ट, डिझाईन आणि टेक्नॉलॉजी विद्यापीठ, पुणे, विश्‍वकर्मा विद्यापीठ, पुणे, अजिंक्य डी.वाय. पाटील विद्यापीठ पुणे, सिंबायोसिस स्किल्स अँड प्रोफेशनल युनिव्हर्सिटी, पुणे, डी. वाय. पाटील इंटरनॅशनल युनिव्हर्सिटी, पुणे, स्पायसर अ‍ॅडव्हेंटिस्ट युनिव्हर्सिटी, पुणे, संदीप विद्यापीठ, नाशिक, संजय घोडावत विद्यापीठ, कोल्हापूर, एमजीएम विद्यापीठ, औरंगाबाद, एमआयटी डब्ल्युपीयु युनिव्हर्सिटी, पुणे, डी. वाय. पाटील विद्यापीठ, अँबी पुणे, विजयभूमी युनिव्हर्सिटी, मुंबई, सोमय्या विद्यापीठ, मुंबई, डीवाय पाटील ॲग्रीकल्चर आणि टेक्निकल विद्यापीठ, कोल्हापूर या विद्यापीठांमधील विविध व्यावसायिक अभ्यासक्रमांना प्रवेश घेता येईल.