पुण्यातील कॅम्पमध्ये पंजाब नॅशनल बँकेसमोर हातात भिकेचा कटोरा घेत शेतकऱ्यांचे आंदोलन

सोलापूरचे करमाळा तालुक्यातील आमदार संजय शिंदे यांनी शेतकऱ्यांच्या कागदपत्रांचा गैरवापर करून घेतले कर्ज

ठळक मुद्देशिंदे हे आधीपासूनच राष्ट्रवादी आणि भाजपशी जवळीक साधून आहेत. त्यामुळे उपमुख्यमंत्री यांनी शेतकऱ्यांची भेट टाळली

पुणे: सोलापूरचे करमाळा तालुक्यातील आमदार संजय शिंदे यांनी शेतकऱ्यांच्या कागदपत्रांचा गैरवापर करून पुण्यातील पंजाब नॅशनल बँकेतून २२ कोटींचे कर्ज घेतले. असा शेतकऱ्यांचा आरोप आहे. त्याबद्दल त्यांनी सोलापूरचे अधिक्षक आणि जिल्हाधिकारी यांच्याकडे तक्रारही केली आहे. मात्र काही उत्तर न आल्याने आज कॅम्पमध्ये असणाऱ्या पंजाब नॅशनल बँकेसमोर शेतकरी उजनी धरण बचाव समितीचे प्रमुख अतुल खूपसे यांच्या नेतृत्वाखाली शेतकऱ्यांनी  आंदोलन केले. हातात भिकेचा कटोरा घेत त्यांनी हलगी वाजवत आंदोलनाला सुरुवात केली होती.

बँकेकडून हवालदिल झालेल्या शेतकऱ्याला कर्ज फेडा अन्यथा फौजदारी गुन्हा दाखल करू. आशा नोटीसा गेल्या आहेत. शेतकऱ्यांनी तक्रार करूनही त्याचे पुढे काहीच झाले नाही. अशा वेळी अन्नदात्याने कोणाकडे न्याय मागावा. असा प्रश्नही खूपसे यांनी उपस्थित केला आहे. 

आता बँकेचे अधिकारी यांनी शेतकऱ्यांच्या कर्ज प्रश्नावर तोडगा काढण्यासाठी सहा महिने लागतील. असा अर्ज आमच्याकडे सोपवला आहे. पण  शेतकऱ्यांनी सहा महिने करायचं काय. त्यांच्या पोटपाण्यासाठी कर्ज मिळणे गरजेचे आहे. आमदार संजय शिंदे यांच्यावर गुन्हा दाखल झाला पाहिजे. अशी मागणीही त्यांनी यावेळी केली आहे. 

उपमुख्यमंत्री यांनी शेतकऱ्यांची भेट टाळली 

संजय शिंदे यांनी कर्ज घेतल्याचे पुरावे उपमुख्यमंत्री अजित पवार यांनी मागितले होते. शिंदे हे आधीपासूनच राष्ट्रवादी आणि भाजपशी जवळीक साधून आहेत. त्यांचे देवेंद्र फडणवीस आणि अजित पवार यांच्याशी चांगले संबंध आहेत. त्यामुळेच उपमुख्यमंत्री यांनी शेतकऱ्यांची भेट टाळली असल्याचा आरोपही त्यांनी यावेळी केला आहे.