कात्रज-देहूरोड महामार्गावर भीषण अपघात; डंपरच्या धडकेत दुचाकीस्वाराचा मृत्यू

हा अपघात दुपारी १ वाजता भूमकर पुलाजवळ घडला...

पुणे : कात्रज-देहूरोड महामार्गावरील भूमकर पुलाकडे जाणाऱ्या सर्व्हिस रोडवर भरधाव डंपरने धडक दिल्याने दुचाकीस्वाराचा जागीच मृत्यू झाला. हा अपघात बुधवारी दुपारी १ वाजता भूमकर पुलाजवळ घडला. निखिल गोविंदराव राठोड (वय २९, रा. ज्ञानेश्वर पार्क, नऱ्हे, मूळ महागाव, यवतमाळ) असे मृत्यू पावलेल्या तरुणाचे नाव आहे.

याबाबत सिंहगड रोड पोलिसांनी डंपरचालकाविरुद्ध गुन्हा दाखल केला आहे. पोलिस शिपाई इरफान तडवी यांनी फिर्याद दिली आहे.

याबाबत मिळालेल्या माहितीनुसार, निखिल राठोड हा मोटारसायकलवरून सर्व्हिस रोडने भूमकर पुलाकडून महामार्गाकडे जात होता. यावेळी भरधाव आलेल्या डंपरने त्यांच्या मोटारसायकलला धडक दिली. निखिल हा डंपरखाली सापडल्याने त्याचा जागीच मृत्यू झाला. अपघातानंतर डंपरचालक गाडी तेथेच टाकून पळून गेला. अपघाताचे वृत्त समजताच सिंहगड रोड पोलिस घटनास्थळी दाखल झाले. त्यांनी वाहने बाजूला घेऊन वाहतूक सुरळीत केली. डंपरचालकाचा शोध घेतला जात आहे.