मुलीला पळवून नेणाऱ्या दोन तरुणांचा पित्याकडून खून

लोकमत न्यूज नेटवर्क

चाकण : वीटभट्टी कामगाराने वीटभट्टी मालकाच्या मुलीला पळवून नेल्याने मुलीच्या वडिलांनी दोघांनाही पकडून, तसेच त्यांना मदत करणाऱ्या एकाला हॉटेलवर डांबून ठेवत तिघांनाही दांडक्याने मारहाण केली. यात दोन तरुणांचा मृत्यू झाल्याची धक्कादायक घटना खेड तालुक्यातील करंजविहिरे येथे शनिवारी (दि. १७) घडली. पित्याने मुलीलाही मारहाण केली असून, ती गंभीर जखमी झाली आहे. तिची मृत्यूशी झुंज सुरू आहे. याप्रकरणी मुलीच्या आई-वडील, भावासह ९ जणांवर गुन्हा दाखल करण्यात आला आहे. ऑनरकिलिंगसारखा हा प्रकार खेड तालुक्यात घडल्याने खळबळ उडाली आहे.

बाळू सीताराम गावडे (वय २६, रा. आसखेड खुर्द, ता. खेड, जि. पुणे), राहुल दत्तात्रय गावडे (वय २८, रा. आसखेड खुर्द) अशी खून झालेल्या तरुणांची नावे आहेत. याप्रकरणी करंजविहिरे येथील ‘माणुसकी’ या हॉटेलचे मालक बाळू मरगज यांच्यासह मुलीची आई ललिता बाळू मरगज (वय ३५), भाऊ प्रसाद बाळू मरगज (वय २०), अभिषेक बाळू मरगज (वय १९), अनिल संभाजी कडाळे, राजू साहेबराव गावडे, किरण बाळू मेंगाळ, चंद्रकला ऊर्फ मुक्ता बाळू गावडे, आनंदा सीताराम जाधव (सर्व जण रा. करंजविहिरे, ता. खेड) यांना चाकण पोलिसांनी अटक केली आहे. याप्रकरणी दत्तात्रय दशरथ गावडे (वय ४०) यांनी फिर्याद दिली.

करंजविहिरे (ता. खेड) येथे बाळू मरगज यांचे ‘माणुसकी’ हे हॉटेल आहे. हॉटेलच्या समोर मरगज यांची मोठी वीटभट्टी आहे. त्याच्या वीटभट्टीवर बाळू सीताराम गावडे हा काम करत होता. बाळू गावडे याचा यापूर्वी चंद्रकला गावडे यांच्याशी विवाह झाला होता. त्यांना मुले आहेत. मात्र, असे असतानाही बाळू याने मरगज यांच्या २१ वर्षीय मुलीशी प्रेमसंबंध ठेवले होते. बाळू गावडे याने वीटभट्टीवर काम करणाऱ्या राहुल दत्तात्रय गावडे याच्या मदतीने मरगज यांच्या मुलीला फूस लावून पळवून नेले होते. दरम्यान, ही घटना बाळू मरगज यांना कळाली. बाळू, राहुल तसेच मुलीचा शोध घेऊन मरगज यांनी तिघांना त्यांच्या हॉटेलमध्ये आणले. या वेळी मरगज व त्यांचे नातेवाईक तसेच बाळू याची बायको चंद्रकला यांनी तिघांनाही लाकडी तसेच लोखंडी दांडक्याने जबर मारहाण केली. या घटनेत बाळू व राहुल यांचा मृत्यू झाला तर मुलगी गंभीर जखमी झाली आहे. तिची प्रकृती चिंताजनक असून तिच्यावर खासगी रुग्णालयात उपचार सुरू आहे. या घटनेत ठार झालेले वीटभट्टीवर काम करणारे दोघेही तरुण आदिवासी ठाकर समाजातील असल्याची माहिती समोर आली आहे. घटनास्थळी चाकण पोलिसांनी मोठा बंदोबस्त तैनात केला आहे.