आळंदी म्हातोबा येथील डोंगराला लागली आग

आळंदी म्हातोबा गावाच्या बाजूने असणारे डोंगर पावसाळ्यात हिरवळीने नेहमीच नटलेले असतात. शेतकऱ्यांच्या जनावरांसाठी खाद्याची व्यवस्था या डोंगरामुळे पूर्ण होत असते. परंतु काल दुपारी अचानक अज्ञात इसमाकडून या ठिकाणी आग लावण्यात आली आणि पाहता पाहता संपूर्ण डोंगरावर आगीचे लोळ पाहायला मिळाले. डोंगरावर चरायला गेलेली जनावरे गावाच्या दिशेने पळू लागली. गावच्या सरपंच सोनाली जवळकर, उपसरपंच श्रीहरी काळभोर व इतर सदस्यांनी तरुणांच्या साहाय्याने आग विझवण्याचा प्रयत्न केला. परंतु थोड्याच वेळात आगीने संपूर्ण डोंगर व्यापला होता. लोकवस्तीकडे सदरील आगीचा काही त्रास होऊ नये म्हणून सामाजिक कार्यकर्ते तुषार जवळकर यांनी वनविभाग व अग्निशामक दलाला याबाबत कल्पना देताच अग्निशामक दलाच्या गाड्या डोंगराच्या पायथ्याशी हजर झाल्या होत्या. वनविभागाच्या १४ जणांच्या तुकडीने गावातील तरुणांच्या साहाय्याने २२ किलो वजनाचे ब्लोअर किट (हवेच्या दाबाचे मशिन) खांद्यावर नेऊन आगीवर नियंत्रण आणण्यात आणले. सुदैवाने यामध्ये जीवितहानी झाली नाही. आगीची माहिती मिळताच महसूल विभागाच्या मंडळ अधिकारी गौरी तेलंग, गावकामगार तलाठी कणींचे व वनविभागाचे अधिकारी रात्री उशिरापर्यंत घटनास्थळी उपस्थित होते.

चौकट

आज दुपारनंतर हवा वाढल्याने पुन्हा एकदा आगीने रौद्र रूप धारण करताच वनविभागाची तुकडी आळंदी म्हातोबा येथे हजर झाली. कालच्या प्रमाणेच ब्लोअर किटच्या साहाय्याने आगीवर नियंत्रण मिळविण्यात यश आले. परंतु वनविभागाच्या अखत्यारीत असणारा मोठा परिसर व त्याच्या तुलनेत कमी प्रमाणात असणारे मनुष्यबळ यामुळे तातडीची सेवा मिळण्यास नेहमीच दिरंगाई होत असते. सध्या असणाऱ्या कर्मचाऱ्यांवर कामाचा ताण येत आहे. काही दिवसांपूर्वी अज्ञात शिकारी वन्यप्राण्यांच्या शिकारीसाठी काडतुसे पेरत असल्याचे निदर्शनात आले होते. गावातील स्थानिक मेंढपाळ रेखा खताळ या प्रकारामुळे जखमी झाल्या होत्या. मल्हारगडामुळे अनेक पर्यटक या ठिकाणी येत असतात. त्यामुळे वनखात्याने अशा प्रकारांवर आळा घालण्यासाठी या ठिकाणी गस्त घालावी.

कोट

गणेश म्हस्के

वनपाल

रात्री आम्हाला आगीची माहिती मिळताच आम्ही घटनास्थळावर दाखल झालो स्थानिक तरुणांच्या मदतीने व उपलब्ध साहित्याच्या आहाय्याने आगीवर नियंत्रण मिळवले. आज दुपारीदेखील माझ्या टीमने उत्तम कार्यवाही करत आगीवर नियंत्रण मिळवले आहे.