गुंतवणूकीच्या आमिषाने ९ जणांना साडेचार कोटींचा गंडा; दरमहा ९ टक्के परतावा देण्याचे आमिष

जर तुम्ही आमच्या कंपनीत गुंतवणूक केली तर तुम्हाला दुप्पट नफा, तसेच दरमहा आठ टक्के नफा देण्याचे आमिष दाखवले

पुणे : शेअर मार्केटमध्ये एक कंपनी ट्रेडिंगचा व्यवसाय करत असल्याचे सांगून गुंतवणुकीवर दरमहा आठ टक्के परतावा देण्याचे आमिष दाखवून ९ जणांना तब्बल ४ कोटी पन्नास लाखांचा आर्थिक गंडा घातल्याचा प्रकार समोर आला आहे.

याप्रकरणी, वारजे पोलिस ठाण्यात निरंजन नवीनकुमार शहा (४२, रा. नांदेड सिटी, सिंहगड रोड) याच्या विरोधात महाराष्ट्रातील ठेवीदारांचे हितसंरक्षण कायद्यानुसार गुन्हा दाखल केला असून, शहा याला अटक करण्यात आली आहे. याप्रकरणी ज्ञानेश्वर एकनाथ कदम (४१,रा. बटरगल्ली, इंदापूर) यांनी फिर्याद दिली आहे. ही घटना डिसेंबर २०२१ ते १६ नोव्हेंबर २०२३ पर्यंतच्या कालावधीत घडली आहे.

पोलिसांनी दिलेल्या माहितीनुसार, फिर्यादी कदम आणि आरोपी शहा हे एकमेकांच्या परिचयाचे आहेत. दोघांची वारजे परिसरात भेट झाली होती. त्यावेळी शहा याने कदम यांना त्याची ग्लोबल ट्रेडर्स, प्राईड ग्रुप आणि गुडवीन ग्रुप या फर्म भारतीय शेअर मार्केटमध्ये ट्रेडिंगचा व्यवसाय करतात. त्यामुळे जर तुम्ही आमच्या कंपनीत गुंतवणूक केली तर तुम्हाला दुप्पट नफा, तसेच दरमहा आठ टक्के नफा देण्याचे आमिष दाखवले. निरंजन शहा याच्या प्रलोभनाला बळी पडून फिर्यादी ज्ञानेश्वर कदम आणि त्यांच्या इतर साथीदारांनी तब्बल साडेचार कोटींची गुंतवणूक केली. मात्र काही कालावधीनंतर व्यवसायात नुकसान झाल्याचे कारण सांगून शहा यांनी पैसे परत करण्यास टाळाटाळ करण्यास सुरूवात केली. 

दरम्यान आपली फसवणूक झाल्याचे लक्षात आल्यावर फिर्यादी कदम यांनी त्यांच्या साथीदारांसह याप्रकरणी आर्थिक गुन्हे शाखेकडे तक्रार अर्ज केला होता. त्या अर्जाच्या चौकशीअंती हा गुन्हा दाखल करण्यात आला आहे. शहा याच्या फर्ममध्ये अशाप्रकारे तब्बल अडीचशे लोकांनी गुंतवणूक केल्याची प्राथमिक माहिती पोलिस तपासात समोर आली आहे. त्यामुळे फसवणुकीचा आकडा मोठा असल्याची शक्यता वर्तवली जात आहे. या प्रकरणाचा पुढील तपास आर्थिक गुन्हे शाखेचे सहायक पोलिस निरीक्षक खंडागळे करत आहेत.