पार्किंगमध्ये चौदा वाहनांना आग; एका चारचाकीसह तेरा दुचाकी जळून खाक
By ऑनलाइन लोकमत | Published: May 29, 2022 12:29 PM2022-05-29T12:29:30+5:302022-05-29T12:36:47+5:30
रविवारी सकाळी भारती विद्यापीठ पोलीस घटनास्थळी दाखल झाले असून गुन्हा दाखल करण्याचे काम सुरू
पार्किंगमध्ये चौदा वाहनांना आग; एका चारचाकीसह तेरा दुचाकी जळून खाक
Next धनकवडी : आंबेगाव खुर्द, बालाजी ग्रीन पार्क येथील साई प्रसाद अपार्टमेंट च्या पार्किंगमध्ये चौदा वाहनांनी पेट घेतल्याची घटना शनिवारी रात्री साडेअकरा वाजण्याच्या सुमारास घडली. या घटनेत एका चारचाकी वाहनासह तेरा दुचाकींचा समावेश आहे.
आंबेगाव खुर्द दरी पुलाजवळ साई प्रसाद अपार्टमेंट असून या अपार्टमेंट मध्ये दहा फ्लॅट आहेत. या इमारतीच्या पार्किंग परिसरात दुचाकी आणि चार चाकी वाहने उभी करण्यात आली होती. त्यातील एका वाहनाने अचानक पेट गेल्याने त्या आगीची झळ त्या ठिकाणी उभ्या केलेल्या इतर वाहनांना ही बसली. यामध्ये इतर चौदा वाहनांनीही पेट घेतला.
वाहनांना आग लागल्याची माहिती मिळताच, कात्रज अग्निशमन दलाच्या कर्मचाऱ्यांनी घटनास्थळी धाव घेत, आगीवर नियंत्रण मिळविण्यास सुरुवात केली. मात्र, आगीवर नियंत्रण मिळवत असताना वाहने पूर्णपणे जळून खाक झाली असून ही आग नेमकी कशामुळे लागली हे अद्यापही समजू शकलेले नाही. तसेच या घटनेत कोणीतीही जीवितहानी किंवा कोणालाही दुखापत झाली नसल्याची अशी माहिती कात्रज अग्निशमन दलाच्या जवानांनी दिली. रविवारी सकाळी भारती विद्यापीठ पोलीस घटनास्थळी दाखल झाले असून गुन्हा दाखल करण्याचे काम सुरू आहे.