वीजबिल थकल्याचा बहाणा करून वृद्धाची फसवणूक; एरंडवणे परिसरातील घटना  

सायबर चोरट्याने देवेश जोशी नामक महावितरणचे कर्मचारी असल्याचे भासवून तब्बल ३५ हजरांचा गंडा घातला....

पुणे : महावितरणचे वीजबिल अपडेट होत नाही असे सांगून सायबर चोरट्यांनी एरंडवणे परिसरात राहणाऱ्या वृद्धाची फसवणूक केल्याची घटना घडली आहे. सायबर चोरट्याने देवेश जोशी नामक महावितरणचे कर्मचारी असल्याचे भासवून तब्बल ३५ हजरांचा गंडा घातला.

अधिक माहितीनुसार हा प्रकार शुक्रवारी (दि. ०३) घडला आहे. एरंडवणे परिसरात राहणाऱ्या ७५ वर्षीय वृद्धाने अलंकार पोलिसांना फिर्याद दिली आहे. त्यानुसार तक्रारदार यांना एका अनोळखी क्रमांकावरून फोन आला. महावितरणकडून देवेश जोशी बोलत असल्याचे भासवून तुमचे मागील महिन्याचे वीजबिल अपडेट झालेले नाही असे सांगितले. त्यांनतर वीजबिल बाकी असल्याचे सांगून ते भरण्यासाठी एक अप्लिकेशन डाउनलोड करण्यास सांगितले.

अप्लिकेशनचा वापर करून रिमोट ऍक्सेस मिळवला. खासगी माहितीचा वापर करून फिर्यादींच्या बँक खात्यातून ३५ हजार रुपये परस्पर ट्रान्स्फर करून घेतले. आपली फसवणूक झाल्याचे लक्षात येताच फिर्यादींनी पोलीस ठाण्यात धाव घेत झालेल्या प्रकारचा जबाब दिला. याप्रकरणी अलंकार पोलीस ठाण्यात गुन्हा दाखल करण्यात आला आहे.