मित्रानेच केला खून

अनैतिक संबंधातून मित्राने मारहाण केल्याचा राग मनात धरून मित्राने मित्राचा खून केल्याची घटना १ महिन्यानंतर नारायणगाव पोलिसांनी उघडकीस आणली़

नारायणगाव : अनैतिक संबंधातून मित्राने मारहाण केल्याचा राग मनात धरून मित्राने मित्राचा खून केल्याची घटना १ महिन्यानंतर नारायणगाव पोलिसांनी उघडकीस आणली़ ही घटना येडगाव (कैलासनगर) येथे घडली़, अशी माहिती नारायणगाव पोलीस ठाण्याचे सहाय्यक पोलीस निरीक्षक रविंद्र थोरात यांनी दिली़
या घटनेत येडगाव (कैलासनगर) येथील मेंढपाळ लक्ष्मण तुळशिराम कारंडे (वय ४५, मूळगाव साकूर मांडवा, दरेवाडी, ता़ संगमनेर जि़ अहमदनगर, सध्या रा़ येडगाव, गणेशनगर) यांचा खून झाल्याचे निष्पन्न झाले़ तर पिराजी भाऊ कारंडे (वय ४७, रा़ साकुर मांडवा (दरेवाडी) ता़ संगमनेर जि़ अहमदनगर ) याने त्याचे साथीदार राहूल भिमाजी औटी (वय २३, रा़ साळवाडी, ज़ुन्नर) , समीर अशोक कोल्हे (वय २१, रा़ कोल्हेमळा नारायणगाव) यांचे मदतीने लक्ष्मण यांचा गळा दाबून केल्याचे उघडकीस आले़
यातील पिराजी कारंडे हा मुख्य आरोपी असून तो फरार आहे़ तसेच राहुल भिमाजी औटी व समीर अशोक कोल्हे हे पोलिसांच्या ताब्यात आहेत़
११ जून रोजी पिराजी कारंडे याने राहुल औटी, समीर कोल्हे व लक्ष्मण याचा मित्र अंकुश औटी यांच्या मदतीने लक्ष्मण तुळशिराम करांडे याचा डिंभा कालव्याच्या जवळ गळादाबून खून करण्याचा प्रयत्न केला़
त्यावेळी लक्ष्मण हा बेशुध्द झाला. त्याला मांडवगण फराटा येथे नेत असताना लक्ष्मण याने
थोडी हालचाल केली. त्यावेळी पिराजी कारंडे याने मफलरच्या साहयाने त्याचा गळा दाबून खून केला व त्याचा मृतदेह कुकडी नदीत फेकून दिला़
त्यानंतर दि़ १३ जून २०१५ रोजी कुकडी नदीच्या तिरावर मांडवगण फराटा परिसरातील एका शेतकऱ्याला हा मृतदेह पाण्यावर तरंगताना दिसला़ त्यावेळी तेथील पोलिसांनी अकस्मित नोंद केली होती़ (वार्ताहर)