'तू पुष्पा चित्रपटातील श्रीवल्लीसारखी दिसते', म्हणत पुण्यात मुलीची काढली छेड

आरोपीकडून भर रस्त्यात मिठी मारण्याचा प्रयत्न...

पुणे : ‘तू पुष्पा चित्रपटातील नायिका श्रीवल्लीसारखी दिसतेस,’ असे एका मुलीला म्हणून एका टोळक्याने तरुणीला भर रस्त्यात मिठी मारण्याचा प्रयत्न केला. हा प्रकार धनकवडी परिसरात घडला आहे.

सहकारनगर पोलिसांनी सोहेल व त्याचा साथीदार आरबाज या दोघा टोळभैरवांवर विनयभंगाचा गुन्हा दाखल केला आहे. हा प्रकार धनकवडीतील शंकर महाराज वसाहतीतील लहुजी समाज मंदिराजवळ शनिवारी रात्री ९ वाजता घडला.

याप्रकरणी धनकवडीतील एका २० वर्षांच्या तरुणीने सहकारनगर पोलिसांकडे फिर्याद दिली आहे. सध्या ‘पुष्पा’ या चित्रपटाची चांगलीच चर्चा आहे. फिर्यादी व आरोपी हे एकाच परिसरात राहण्यास आहेत. सोहेल व आरबाज हे दोघे फिर्यादीच्या घरासमोर येथून शिट्ट्या मारत असत.

त्यावर फिर्यादी हिने त्यांना शिट्ट्या का वाजवतो, असे विचारले. तेव्हा सोहेल याने तू पुष्पामधील हिरोईनसारखी दिसतेस, मला तुझ्याशी लग्न करायचे आहे, असे म्हणून तिचा हात धरून तिला मिठी मारण्याचा प्रयत्न केला. हे पाहून तिचा भाऊ फिर्यादीला सोडविण्यासाठी आला असताना आरबाज याने त्याला मारहाण करून जिवे मारण्याची धमकी दिली. त्यामुळे दोघांनी आरडाओरडा केल्यामुळे आरोपी तेथून पळून गेले. सहायक पोलीस निरीक्षक लोंढे तपास करीत आहेत.