तिला सिगारेटचे चटके दिले, शरीरसंबंधासाठी जबरदस्ती केली !

हिंजवडी येथे मंगळवारी दुपारी तीनच्या सुमारास ही घटना घडली

पुणे/पिंपरी : दोन तरुणांनी एका तरुणीच्या घरात घुसून जाळून टाकण्याची धमकी देत तिला सिगारेटचा चटका देण्याचा प्रयत्न केला. त्यानंतर लोखंडी झारा गरम करून त्याचे चटके देत तरुणीवर शरीरसंबंधासाठी जबरदस्ती केली. हिंजवडी येथे मंगळवारी (दि. ५) दुपारी तीनच्या सुमारास ही घटना घडली.

हिंजवडीत हा प्रकार घडला असला तरी प्रत्यक्षात या तरुणीने ही घटना आयनॉक्स येथे एका रिक्षामध्ये घडल्याचे सुरुवातीला सांगितले होते. बंडगार्डन पोलिसांनी तातडीने गुन्हा दाखल करून त्याची चौकशी केली. त्यात असा कोणताही प्रकार घडल्याचे पुरावे मिळत नव्हते. त्याचवेळी या तरुणीच्या अंगावर भाजल्याचे डाग होते शेवटी महिला पोलीस अधिकाऱ्यांनी तिला विश्वासात घेतल्यावर तिने खरा प्रकार सांगितले. त्यानंतर हिंजवडी पोलीस ठाण्यात या १८ वर्षाच्या तरुणीची फिर्याद दाखल करून घेण्यात आली. याबाबत पोलिसांनी दिलेल्या माहितीनुसार, ही तरुणी मंगळवारी दुपारी घरी असताना दोघेजण तिच्या घरी आले. तुमच्या रूममधून पाण्याचा कॅन घ्यायचा आहे, असे म्हणून एकाने तरुणीच्या घरात प्रवेश केला. त्यानंतर फिर्यादी तरुणीसोबत गैरवर्तन केले. त्यामुळे फिर्यादी यांनी स्टीलचा झारा आरोपीला फेकून मारला.

आरोपीने त्याच्या दुसऱ्या साथीदाराला घरात बोलावून घेतले. त्यानंतर तरुणीसोबत शरीरसंबंधासाठी जबरदस्ती केली. जाळून टाकू, अशी धमकीही आरोपींनी दिली. पेटलेल्या सिगारेटने तरुणीला चटका देण्याचा प्रयत्न केला. मात्र, तरुणीने झटका दिल्याने सिगारेट खाली पडली. त्यानंतर आरोपींनी झारा गॅसवर गरम केला आणि त्याने तरुणीच्या हातावर चटका दिला. तरुणीसोबत गैरवर्तन करून तिचा विनयभंग केला. दरम्यान, याप्रकरणी संशयितांपैकी एकजण या तरुणीच्या ओळखीचा असल्याचे समजते.