शासकीय डॉक्टर, कर्मचारी पोलिसांना मारहाण

लोकमत न्यूज नेटवर्क

चाकण : दारू पिऊन दोन तरुणांनी शासकीय रुग्णालयातील डॉक्टर व सुरक्षारक्षक यांना मारहाण केल्याची घटना सोमवारी (दि ८) रात्री घडली. घटनास्थळी आलेल्या पोलीस कर्मचाऱ्यांना देखील आरोपींनी मारहाण केली. दरम्यान दोन दारुड्या तरुणांना चाकण पोलिसांनी अटक केली आहे.

श्रीकांत घनशाम अंभोरे (वय २४) व कन्हैया यादव ढवळे (वय २४, दोघे सध्या रा. खराबवाडी ता. खेड, मूळ रा. वसमत जि. हिंगोली) अशी अटक करण्यात आलेल्या आरोपींची नावे आहेत. याबाबत चाकण ग्रामीण रुग्णालयाचे वैद्यकीय अधिकारी डॉ. विनायक ज्ञानेश्वर मोहळे यांनी फिर्याद दिली आहे. डॉ. मोहळे चाकण ग्रामीण रुग्णालयात काम करत असताना सोमवारी रात्री एक वाजता दोघे जण दारू पिऊन रुग्णालयात आले. या दोघांनी डॉक्टर मोहळे यांना धक्काबुक्की करत मारहाण केली. त्यानंतर रुग्णालयातील सुरक्षारक्षक ज्ञानेश्वर हिवराळे यांना धक्काबुक्की करून मारहाण केली. येथे असलेले पोलिस कर्मचारी बजरंग साबळे यांना देखील आरोपींनी शिवीगाळ करत मारहाण करून जखमी केले. शासकीय कामात अडथळा, महाराष्ट्र दारूबंदी अधिनियम, महाराष्ट्र वैद्यकीय सेवा संस्था हिंसक कृत्य हानी व नुकसान यांना प्रतिबंध अधिनियम आशा विविध कलमान्वये गुन्हा दाखल करून दोघांना अटक केली आहे.

फोटो : चाकण रुग्णालयात झालेली हाणामारी