सराईत गुन्हेगाराचा टोळक्याकडून खून

गुन्हेगारीक्षेत्रात बस्तान बसवण्याच्या तयारीत असलेल्या सराईत गुन्हेगाराचा तरुणाच्या टोळक्याने धारदार शस्त्राने वार करून खून केल्याची घटना घडली आहे. ही घटना रविवारी दुपारी दोन वाजण्याच्या सुमारास गोंधळेनगर येथील शनिमंदिर चौकात घडली घडली आहे.

हडपसर - गुन्हेगारीक्षेत्रात बस्तान बसवण्याच्या तयारीत असलेल्या सराईत गुन्हेगाराचा तरुणाच्या टोळक्याने धारदार शस्त्राने वार करून खून केल्याची घटना घडली आहे. ही घटना रविवारी दुपारी दोन वाजण्याच्या सुमारास गोंधळेनगर येथील शनिमंदिर चौकात घडली घडली आहे. पूर्ववैमनस्यातून हा खून झाला असावा असा संशय व्यक्त करण्यात येत आहे. याप्रकरणी हडपसर पोलीस ठाण्यात खुनाचा गुन्हा दाखल करण्यात आला आहे.
सुजित वर्मा (वय २२, रा़ मूळ रा़ माळवाडी, हडपसर) असे त्याचे नाव आहे़ सुजित गोंधळेनगर येथून सासवड रोडच्या दिशेने दुचाकीवर जात असताना शनिमंदिर चौकाजवळ दबा धरून बसलेल्या तीन ते चार जणांच्या टोळक्याने त्याच्यावर धारदार शस्त्राने वार केले. यामुळे जखमी झालेला सुजित जागीच कोसळला. याची माहिती मिळताच हडपसर पोलीस ठाण्याचे पोलीस अधिकारी तातडीने घटनास्थळी पोहोचले़ परंतु, सुजितचा जागीच मृत्यू झाला होता़
सुजित मूळचा अहमदनगर येथील रहिवासी आहे. तेथे त्याच्यावर गंभीर स्वरूपाचे अनेक गुन्हे दाखल असल्याने त्याला तडीपार करण्यात आले होते. सध्या तो हडपसर परिसरात राहत होता. मांजरी, हडपसर अशा परिसरातील तरुणांना सोबत घेऊन गुन्हेगारीक्षेत्रात बस्तान बसविण्यासाठी सुजित छोटे-मोठे गुन्हे करीत होता. त्याच्याविरुद्ध यापूर्वी हडपसर पोलीस ठाण्यातही मारामारीचे गुन्हे दाखल आहेत.
घटनास्थळी वरिष्ठ पोलीस अधिकाºयांनी भेट दिली असून पोलिसांनी केलेल्या तपासणीत घटनास्थळाजवळील सीसीटीव्हीमध्ये हल्लेखोर कैद झाले असून त्यांचा शोध पोलीस घेत आहेत. सहायक पोलीस निरीक्षक के. एस़ लोंढे अधिक तपास करीत आहेत़