बारामतीत पोलिसांनी गुटख्याचा

बारामती : पिंपळी ते जळोची मार्केट यार्ड रस्त्यावर गुणवडी (ता. बारामती) गावच्या हद्दीत बारामती शहर पोलिसांनी एका घरावर छापा टाकला. या कारवाईत पोलिसांनी सुमारे २ लाख ३७ हजार रुपयांचा गुटख्याचा साठा जप्त केला आहे.

पोलीस सूत्रांनी दिलेल्या माहितीनुसार: पोलीस कर्मचारी जितेंद्र शिंदे यांनी याबाबत फिर्याद दिली. याप्रकरणी संग्राम रामेश्वर देवकाते (वय २९, रा. गिरीजानगर, गुणवडी) याच्या विरोधात शहर पोलीस ठाण्यात गुन्हा दाखल करण्यात आला आहे. शनिवारी (दि. १७) रोजी ही कारवाई करण्यात आली. सहाय्यक पोलिस निरीक्षक दंडीले, महिला पोलिस नाईक निगडे, जितेंद्र शिंदे हे संचारबंदीच्या अनुषंगाने पेट्रोलिंग करत असताना दंडीले यांना याबाबतची माहिती मिळाली. त्यानुसार सरकारी पंच तयार करत पंचांसमक्ष देवकाते याच्या घरी छापा टाकण्यात आला. यावेळी भिंतीलगत चार पोत्यांमध्ये गुटखा भरून ती एकावर एक रचून ठेवलेली दिसून आली.पोलिसांनी ती ताब्यात घेत उघडून पाहिली असता त्यात २ लाख ३७ हजार रुपयांचा साधारणत: ५० ते ६० किलो गुटखा मिळून आला. राज्यत गुटखा बंदीचा आदेश असताना तो विक्री करण्याच्या उद्देशाने देवकाते याने घरी ठेवला होता. त्याच्या विरोधात पोलिसांनी गुन्हा दाखल करत त्याला अटक केली आहे.

————————————————