"एकदा काय ते होऊनच जाऊ दे...", राज ठाकरेंच्या पुण्यातील सभेचा टिझर पाहिला का?

पुण्यात होणाऱ्या राज ठाकरेंच्या सभेचा टिझर मनसेकडून प्रदर्शित करण्यात आला आहे.

पुणे : महाराष्ट्र नवनिर्माण सेनेचे अध्यक्ष राज ठाकरेंची २१ ते २८ मे दरम्यान पुण्यात सभा होणार असल्याची माहिती मनसे पदाधिकाऱ्यांनी दिली होती. परंतु ठिकाण मात्र ठरत नव्हते. सुरुवातीला सर परशुरामभाऊ महाविद्यालय येथे सभेची जागा निश्चित करण्यासाठी पोलिसांकडे परवानगी मागण्यात आली होती. त्यानंतर मुळा - मुठा नदीपात्रात २१ मेला जागा फिक्स करण्यात आली. पण तिथेही पावसाचे कारण देऊन पदाधिकाऱ्यांनी पुन्हा सभा रद्द झाल्याचे सांगितले. अखेर आज मनसेने रविवारी पुण्यात सभा होणार असल्याची अधिकृत घोषणा केली आहे. शहरात गणेश कला क्रीडा मंच येथे रविवार २२ मे रोजी सकाळी १० वाजता सभा होणार असल्याची माहिती मनसेने दिली आहे. त्या पार्श्वभूमीवर पुण्यात होणाऱ्या राज ठाकरेंच्या सभेचा टिझर मनसेकडून प्रदर्शित करण्यात आला आहे.  

टिझरमध्ये राज ठाकरेंच्या सुरुवातीला औरंगाबादच्या सभेतील एकदा काय ते होऊनच जाऊ दे... हे वाक्य घेण्यात आले आहे. तर टिझरमध्ये छत्रपती शिवाजी महाराजांचे गाणंही वाजत आहे. या टीझरवरून पुण्यातील सभा जोरदार होणार असल्याची चिन्हे दिसू लागली आहेत. त्या अनुषंगाने मनसेचे पुण्यातील सर्व पदाधिकारी जोमाने कामाला लागले आहेत. 

"एकदा काय ते होऊनच जाऊ दे..." राज ठाकरेंच्या पुण्यातील सभेचा टिझर प्रदर्शित #Pune#RajThackeraypic.twitter.com/EJTxtcwZJ8

— Lokmat (@lokmat) May 20, 2022

अयोध्या दौऱ्याबाबत पुण्यातील सभेत सविस्तर बोलणार     

अध्यक्ष राज ठाकरे यांचा अयोध्या दौरा स्थगित करण्यात आला आहे. राज ठाकरे ५ जून रोजी अयोध्येच्या दौऱ्यावर जाणार होते. परंतु प्रकृती अस्वस्थामुळे राज ठाकरेंचा दौरा काही काळासाठी स्थगित केला गेल्याची माहिती समोर आली आहे. राज ठाकरे यांच्या पायाला दुखापत झाली होती. पायाच्या दुखण्यानं पुन्हा एकदा डोकं वर काढल्यामुळे डॉक्टरांचा सल्ल्यानुसार त्यांनी अयोध्या दौरा स्थगित केल्याचं सांगितलं जात आहे. राज ठाकरेंनी त्यांच्या ट्विटर हँडलवर अयोध्या दौरा स्थगित केल्याची माहिती दिली आहे. यात त्यांनी अयोध्या दौरा स्थगित केला असून रविवारी पुण्यात होणाऱ्या सभेत याबाबत सविस्तर बोलू असं म्हटलं आहे.  

राज ठाकरे कोणत्या विषयावर बोलणार 

औरंगाबाद, ठाणे या सभेत राज ठाकरेंनी हिंदुत्व, भोंगे अशा विषयांवर भाष्य केले. तर शरद पवारांबरोबरच महाविकास आघाडीवर टीका केली. आता पुण्यात होणाऱ्या सभेत राज ठाकरे कोणत्या विषयावर बोलतील. याकडे सर्वांचे लक्ष लागले आहे.  .