पुण्यात आळंदी म्हातोबाची येथे महिलेनं २ वर्षाच्या मुलासह विहिरीत उडी मारून संपवलं जीवन

महिला आपल्या मुलासह मागील दोन दिवसांपासून बेपत्ता असल्याची तक्रार कविताच्या नातेवाईकांनी हडपसर पोलीस ठाण्यात दिली होती.

थेऊर : आळंदी म्हातोबाची येथील एका ३० वर्षीय महिलेने आपल्या दोन वर्षाच्या मुलासह विहिरीत उडी घेऊन आत्महत्या केल्याचा धक्कादायक प्रकार शुक्रवारी संध्याकाळी सहा वाजण्याच्या सुमरास उघडकीस आला आहे. कविता देविदास भोसले (वय ३०, रा. भेकराईनगर, मूळगाव उमरगा जि. उस्मानाबाद) व प्रणीत देविदास भोसले (वय - २ ) असं लहान मुलासह आत्महत्या केलेल्या महिलेचं नाव आहे.

लोणी काळभोर पोलिसांनी दिलेल्या माहितीनुसार, कविता आपल्या मुलासह मागील दोन दिवसांपासून बेपत्ता असल्याची तक्रार कविताच्या नातेवाईकांनी हडपसर पोलीस ठाण्यात दिली होती. त्यानुसार हडपसर पोलीस कविता चा शोध घेत असताना कविताच्या मोबाइलचे शेवटचे लोकेशन आळंदी म्हातोबा येथे असल्याचे आढळून आले होते.

त्यानुसार लोणी काळभोर पोलिस व हडपसर पोलीस आळंदी म्हातोबाची गावाच्या परिसरात शोध घेत असताना, गायकवाड वस्ती येथील एका विहिरीत महिलेचा मृतदेह शुक्रवारी संध्याकाळी सहा वाजण्याच्या सुमारास पाण्यावर तरंगताना आढळून आला. त्या ठिकाणी जाऊन पाहणी केली असता सदरचा मृतदेह हा कविता व तिच्या मुलाचा असल्याचे आढळून आले आहे. लोणी काळभोर पोलिस घटनास्थळी पोहोचले असून पुढील कारवाई चालू आहे.