चारचाकीला कट मारण्याचा बहाणा केला अन् बोलण्यात गुंतवून १२ लाखांना लुटला

रोख रक्कमेची पिशवी चोरी केल्याप्रकरणी चालकासह तीन जणांना अटक केली आहे.

चाकण : चारचाकीला कट मारल्याचा बहाणा करून दोघांपैकी एकाने चालकाला बोलण्यात गुंतवून १२ लाख लुटल्याचा धक्कादायक प्रकार समोर आला आहे. गाडीत मागच्या सीटवर ठेवलेली रोख रक्कमेची पिशवी चोरी केल्याप्रकरणी चालकासह तीन जणांना अटक केली आहे.

राजू रावसाहेब बोराडे ( वय.३७ वर्षे,रा.करूले,ता.संगमनेर, जि. अहमदनगर) यांनी याबाबत चाकण पोलीस ठाण्यात फिर्याद दाखल दिली होती. याप्रकरणी कारचालक सुरेश दादू गायकवाड ( वय.३२ वर्षे), समीर सोनवणे ( वय.२१ वर्षे ),अक्षय पुंजा सोनवणे ( वय.२७ वर्षे ),प्रदीप सुनील नवाळे ( वय.२२ वर्षे,सर्व रा.संगमनेर, जि. अहमदनगर ) यांना अटक करण्यात आली असून त्यानी चोरलेले बारा लाख रुपयांपैकी अकरा लाख रुपये जप्त करण्यात आले आहेत.

चाकण पोलिसांनी दिलेल्या माहितीनुसार, बोराडे हे के.के.थोरात ( संगमनेर, जि. अहमदनगर ) या कंपनीत लेखापाल म्हणून नोकरी करत आहेत. रविवारी ते कामगारांचे पगार करण्यासाठी बारा लाख रुपये रोख रक्कम घेऊन कार चालक सुरेश दादू गायकवाड सोबत पुण्याच्या दिशेने जात होते. त्यावेळी चाकण येथील तळेगाव चौकाजवळ दुचाकीवरून जाणाऱ्या दोघांनी त्यांची गाडी अडवली. 'आमच्या गाडीला कट का मारला' असे म्हणत बोराडे यांना बोलण्यात गुंतवून एका अनोळखी इसमाने कारमध्ये मागच्या सीटवर ठेवलेली बारा लाख रोख रक्कम असलेली पिशवी घेऊन पोबारा केला होता. चाकण पोलीस अधिक तपास करीत आहेत.