‘आता ट्रेलर आहे, नंतर पूर्ण पिक्चर दाखवेन’; दिघीमध्ये पूर्ववैमनस्यातून तरुणाला बेदम मारहाण

दिघी येथील दत्तनगर चौपाटीवर शुक्रवारी (दि. २६) रात्री सव्वानऊच्या सुमारास ही घटना घडली....

पिंपरी : आता ट्रेलर आहे, यानंतर पूर्ण पिक्चर दाखवेन, असे म्हणत पूर्ववैमनस्यातून टोळक्याने अंडा बुर्जीच्या गाडीवर काम करणाऱ्या तरुणावर कोयत्याने वार करून गंभीर जखमी केले. दिघी येथील दत्तनगर चौपाटीवर शुक्रवारी (दि. २६) रात्री सव्वानऊच्या सुमारास ही घटना घडली.

गौरव बळीराम शेवाळे (३०, रा. शास्त्री चौक, आळंदी भोसरी रोड, दिघी) असे जखमी तरुणाचे नाव आहे. त्यांनी याप्रकरणी शनिवारी (दि. २७) दिघी पोलिस ठाण्यात फिर्याद दिली. त्यानुसार शुभम संदीप सोनवणे (२३, रा. आदर्श नगर, दिघी) आणि त्याच्या इतर तीन साथीदारांच्या विरोधात पोलिसांनी गुन्हा दाखल केला.

पोलिसांनी दिलेल्या माहितीनुसार, फिर्यादी गौरव हे दत्तनगर चौपाटी येथे अंडा बुर्जीच्या गाडीवर काम करतात. शुक्रवारी रात्री काम करत असताना त्यांच्या ओळखीचा शुभम सोनवणे हा त्याच्या इतर तीन साथीदारांसोबत अंडा बुर्जीच्या गाडीवर आला. त्याने जुन्या भांडणाच्या कारणावरून गौरव यांना दगडाने, कोयत्याने, लोखंडी पट्टीने आणि लाथांनी मारहाण करून जखमी केले. ‘तू लायकीत राहायचे नाही तर आता ट्रेलर दाखवला आहे यानंतर पूर्ण पिक्चर दाखवेन’, अशी धमकीही गौरव यांना दिली. हवेत कोयता फिरवत ‘लाल्या भाऊ सोबत पंगा नाही घ्यायचा’ अशी धमकी देत निघून गेले.