हॉटेलच्या मॅनेजराला कामगारांकडून मारहाण

लोकमत न्यूज नेटवर्क

पुणे : शिवाजी रोडवरील प्यासा हॉटेलच्या मॅनेजरला किरकोळ कारणावरून कामगारांनी बिअरची बाटली फोडून जखमी केले. हा प्रकार प्यासा हॉटेलमध्ये ९ मे रोजी रात्री दहा वाजता घडला.

याप्रकरणी सोमनाथ सगर (वय ३३, रा. सुखसागरनगर, कात्रज) यांनी खडक पोलिसांकडे फिर्याद दिली आहे. त्यावरुन पोलिसांनी बबलु जंगले आणि विशाल पाटील (रा. प्यासा हॉटेल, शुक्रवार पेठ) यांच्याविरुद्ध गुन्हा दाखल केला आहे. याबाबत पोलिसांनी सांगितले की, सोमनाथ सगर हे हॉटेल प्यासाचे लॉजमध्ये मॅनेजर आहेत. सध्या लॉकडाऊनमुळे हॉटेल बंद आहे. तेथील कामगार हॉटेलमध्येच राहतात. सगर व त्यांचे मित्र बलराम व प्रकाश तसेच आरोपी हे रात्री जेवण करीत होते. त्यावेळी बबुल जंगले याने आमचे कामाचे मध्ये का येतो, असे म्हणून शिवीगाळ केली. टेबलावर रिकाम्या बाटली बॉक्समधून बिअरची काचेची बाटली घेऊन ती सगर यांना मारली. विशाल पाटील याने हाताने मारहाण केली. त्यांना सोडविण्यासाठी बलराम व प्रकाश हे आले असताना त्यांनाही शिवीगाळ करुन मध्ये पडायचे नाही, अशी धमकी दिली. बिअरच्या बाटलीची काच सगर यांच्या डाव्या डोळ्याचे खाली लागून ते जखमी झाले आहेत. खडक पोलीस अधिक तपास करीत आहेत.