सोलापूरहून येऊन पहिल्या पत्नीने सवतीला शिकवला धडा; घरात शिरुन मारहाण करुन चोरला ऐवज  

सोलापूरमध्ये मेडिकल दुकान असल्याने पुण्यात राहत असलेल्या सवतीला पहिल्या पत्नीला मारहाण केली. 

पुणे : सोलापूरमध्ये मेडिकल दुकान असल्याने पुण्यात दुसरा घरोबा केला. त्यावरुन गेल्या २ वर्षापासून त्यांच्यात वादावादी सुरु होती. शेवटी पहिली पत्नी व तिच्या नातेवाईकांनी पुण्यात येऊन सवतीच्या घरात शिरुन तिला मारहाण केली. घरातील वस्तूंची तोडफोड करुन दीड लाख रुपयांचे दागिने व रोख रक्कम चोरुन नेली. याप्रकरणी हिंगणे येथे राहणाऱ्या एका ३६ वर्षाच्या महिलेने सिंहगड रोड पोलीस ठाण्यात फिर्याद दिली आहे. त्यानुसार पोलिसांनी तिची सवत व तिच्या ८ नातेवाईकांविरुद्ध विनयभंग, खुनाचा प्रयत्न, दरोड्याचा गुन्हा दाखल केला आहे.

याबाबत पोलिसांनी दिलेल्या माहितीनुसार, फिर्यादी या गेल्या २ वर्षांपासून त्या कृष्णा सुरवसे यांच्या दुसऱ्या पत्नी आहेत. त्यांच्या पतीचे सोलापूरमध्ये मेडिकल दुकान आहे. त्या पतीसह हिंगणे येथे राहतात. ही बाब त्यांच्या पहिल्या पत्नीला माहिती होती. त्यावरुन त्यांच्यात वाद सुरु होता. ८ जानेवारी रोजी पहाटे साडेचार वाजण्याच्या सुमारास त्यांची पहिली पत्नी व तिचे नातेवाईक त्यांचा शोध घेत फिर्यादी यांच्या घरी आले. परंतु, त्यांचे पती त्यांना सापडले नाही. फिर्यादी यांनी दार उघडल्यावर ते सर्व जण घरात शिरले. त्यांनी फिर्यादी यांना खाली पाडून कपडे फाडले. रवी साळुंके याने त्यांचा विनयभंग केला. त्याने कोयत्याने व त्यांच्या सवतीने चाकूने त्यांच्यावर वार केले. परंतु, त्यांनी हे वार चुकविले. इतरांनी घरातील वस्तुंची तोडफोड करुन १ लाख ४० हजार रुपयांचे सोन्याचे दागिने व रोख रक्कम जबरदस्तीने घेऊन ते निघून गेले. सहायक पोलीस निरीक्षक कादबाने अधिक तपास करीत आहे.