बाळ म्हणाले, मी दारू पितो! 'पप्पांनीच मला गाडी दिली'; मरण स्वस्त होत आहे, यंत्रणेने केले दोन खून

पुण्यातील कल्याणीनगर भागात रविवारी पहाटे घडलेल्या अपघातात दोघांचा मृत्यू झाला. या प्रकरणी ‘ब्रह्मा ग्रुप’चे विशाल अग्रवाल यांच्यासह चार जणांवर गुन्हा दाखल झाला आहे...

पुणे : मी कार चालविण्याचे रीतसर प्रशिक्षण घेतलेले नाही, वाहन चालविण्याचा परवानाही नाही, तरीदेखील वडिलांनीच त्यांच्या मालकीची ग्रे रंगाची पोर्श कार माझ्याकडे दिली, तसेच मित्रांसमवेत हॉटेलमध्ये पार्टी करण्यास परवानगी दिली. मी मद्यप्राशन करीत असल्याचेही वडिलांना माहिती आहे, असे अल्पवयीन आरोपीने सांगितले. चौकशीदरम्यान त्याने पोलिसांना ही माहिती दिली. पुण्यातील कल्याणीनगर भागात रविवारी पहाटे घडलेल्या अपघातात दोघांचा मृत्यू झाला. या प्रकरणी ‘ब्रह्मा ग्रुप’चे विशाल अग्रवाल यांच्यासह चार जणांवर गुन्हा दाखल झाला आहे. (builder vishal agrawal son killed two people in pune)

विशाल अग्रवाल यांच्याखेरीज अल्पवयीन मुलाला बार आणि पबमध्ये प्रवेश देणाऱ्या हाॅटेल कोझीचे मालक प्रल्हाद भुतडा, व्यवस्थापक सचिन काटकर, हाॅटेल ब्लॅकचे मालक संदीप सांगळे, बार व्यवस्थापक जयेश बोनकर यांच्याविरुद्धही गुन्हा दाखल करण्यात आला आहे. पुण्यात कल्याणीनगर भागात अल्पवयीन मुलाने मद्यपान करून कार चालवून झालेल्या अपघातात अनिस अवधिया आणि अश्विनी कोस्टा हे तरुण-तरुणी मृत्युमुखी पडले. त्याचे संतप्त पडसाद शहरात सोमवारी दिवसभर उमटले.

पोलिस आयुक्त अमितेश कुमार यांनी सांगितले, की आरोपी मुलगा अल्पवयीनच असून, जन्माचा पुरावा मिळाला आहे. मुलाला न्यायालयाने दिलेल्या जामिनाविरोधात अपील करणार आहोत. दरम्यान, अल्पवयीन मुलाने चालविलेली कार केवळ विनाक्रमांकच नव्हती, विनारजिस्ट्रेशन असल्याचे समोर आले आहे. उपप्रादेशिक परिवहन अधिकारी संजीव भोर यांनी सांगितले, की अपघातग्रस्त आलिशान कार मुंबई डीलरने रजिस्ट्रेशन प्रक्रिया पूर्ण न करताच दिली आहे. त्यामुळे डीलरच्या ट्रेड सर्टिफिकेटवर कारवाई होऊ शकते. ती प्रक्रिया सुरू केली आहे.

अल्पवयीन मुलाला पोलिस ठाण्यात आणल्यानंतर त्याला व्हीआयपी वागणूक दिल्याचा आरोप मृतांच्या नातेवाइकांनी केला आहे. मुलाला झोपण्याची सोय आणि मुलाच्या नातेवाइकांनी पिझ्झा बर्गरही बाहेरून आणून त्याला दिल्याचे ते म्हणाले. तसेच, अपघाताबाबत अनेकांनी संवेदना व्यक्त केल्या. कँडल मार्च काढले गेले. मात्र, मृतांच्या नातेवाइकांना भेटण्याची तसदी कुठल्याही नेत्याने, नागरिकाने घेतली नाही, असा खेदही व्यक्त केला.

अश्विनी आणि अनिस यांच्या कुटुंबीयांचा आक्रोश सर्वांचे हृदय पिळवटून टाकणारा होता. अश्विनी मूळची मध्य प्रदेशातील जबलपूर येथील आहे. अनिसचे आई-वडील वृद्ध असून, अनिस हा त्यांचा एकमेव आधार होता. अनिस आणि अश्विनी दोघांनीही कम्प्युटर सायन्समध्ये पदवी घेतली होती. एका खासगी कंपनीत दोघेही कामाला होते.

न्यायालयाच्या निर्णयावर नाराजी

अपघातानंतर अल्पवयीन मुलाला बाल न्यायालयाने काही अटी व शर्तींवर जामीन मंजूर केला. मुलाला न्यायालयाने १५ दिवस वाहतूक पोलिसांसोबत काम करण्यास सांगितले. तसेच, ‘अपघात’ या विषयावर निबंध लिहिण्याची अट घातली; तसेच येरवडा वाहतूक पोलिसांसोबत वाहतूक नियमन करणार आहे. दोघांच्या मृत्यूला कारणीभूत ठरलेल्या करोडपतीच्या मुलाला निबंध लिहिणे, वाहतूक पोलिसांसोबत काम करणे अशा शिक्षा असतात का, असा सवाल शहरवासीयांनी व्यक्त केला आहे.