"मी त्यांच्याकडे नोकरी करायचो...", बिल्डरपुत्राला मदत केल्याच्या आरोपावर सुनील टिंगरेंची प्रतिक्रिया
By ऑनलाइन लोकमत | Published: May 21, 2024 08:26 PM2024-05-21T20:26:43+5:302024-05-21T20:27:26+5:30
मी पोलीस स्टेशनमधील सीसीटीव्ही फुटेज खुले करण्याची मागणी करतो
![I used to work for them Sunil Tingre's reaction to the allegation of helping the builder's son | "मी त्यांच्याकडे नोकरी करायचो...", बिल्डरपुत्राला मदत केल्याच्या आरोपावर सुनील टिंगरेंची प्रतिक्रिया I used to work for them Sunil Tingre's reaction to the allegation of helping the builder's son | "मी त्यांच्याकडे नोकरी करायचो...", बिल्डरपुत्राला मदत केल्याच्या आरोपावर सुनील टिंगरेंची प्रतिक्रिया](https://d3pc1xvrcw35tl.cloudfront.net/images/420x315/tingare-nm-21_2024051235269.jpg)
"मी त्यांच्याकडे नोकरी करायचो...", बिल्डरपुत्राला मदत केल्याच्या आरोपावर सुनील टिंगरेंची प्रतिक्रिया
पुणे: शहरातील कल्याणीनगर भागात झालेल्या कार अपघातामुळे राज्यासह देशभरात संताप व्यक्त करण्यात येत आहे. एका पोर्शे कारनं २ जणांना चिरडले. त्यानंतर या घटनेतील आरोपींना तातडीने जामीनही मिळाला त्यामुळे नागरिकांमध्ये रोष आहे. त्यातच विरोधकांकडून या घटनेत सत्ताधारी आमदारांकडूनपोलिसांवर दबाव टाकल्याचा आरोप करण्यात येत आहे. हा आरोप पुण्यातील वडगाव शेरीचे अजित पवार गटाचे आमदार सुनिल टिंगरे यांना टार्गेट करण्यात येत आहे. मात्र या घटनेवर टिंगरे यांनी खुलासा केला आहे. राजकीय क्षेत्रात प्रवेश करण्या आधी मी त्यांच्याकडे नोकरी करायचो. एवढाच त्यांचा आणि माझा संबंध असल्याचे त्यांनी माध्यमांशी बोलताना सांगितले आहे.
टिंगरे म्हणाले, माझ्या मतदारसंघात घडलेल्या घटनेबद्दल दुःख व्यक्त करतो. रात्री तीन वाजून 21 मिनिटांनी माझ्या पी एचा मला फोन आला की मोठा अपघात झाला आहे. त्यानंतर अनेक कार्यकर्त्यांनीही मला फोनवरून माहिती दिली. तसेच विशाल अग्रवाल यांचा देखील फोन आला की माझ्या मुलाला मारहाण झाली आहे. मी पोलिस स्टेशनला पोहचलो. त्यानंतर पोलीसांनी मला माहिती दिली. त्यानंतर मी पोलिसांना कायद्यानुसार कारवाई करायला सांगितलं. मृतांच्या नातेवाईकांशी देखील मी बोललो. मी पब आणि बारच्या विरोधात नेहमीच भूमिका घेतलीय. राजकीय क्षेत्रात प्रवेश करण्याआधी मी त्यांच्याकडे नोकरी करायचो. एवढाच त्यांचा आणि माझा संबंध आहे. मृतांच्या नातेवाईकांना मी मदत केली. मी पोलीस स्टेशनमधील सीसीटीव्ही फुटेज खुले करण्याची मागणी करतो आहे.
दरम्यान सुनील टिंगरे यांनी सकाळी फेसबुक पोस्टही केली आहे. या अपघातप्रकरणी मी पोलिसांवर दबाव आणल्याचा खोडसाळपणा काही घटकांकडून सोशल मिडियात केला जातोय. यामुळं माझी सार्वजनिक व राजकीय जीवनात बदनामी होण्याची शक्यता असल्याने वस्तुस्थिती याठिकाणी नमूद केली आहे. वास्तविक मी पहिल्यापासून ‘नाईट लाईफ’च्या विरोधात आहे आणि याबाबत वेळोवेळी आवाजही उठवला आहे. विमाननगर, कल्याणीनगर, खराडी या उच्चभ्रू भागात रात्री उशिरापर्यंत अवैधरित्या सुरु असलेले पब, बार आणि टेरेस हॉटेल तसंच दारु विक्री, मटका धंदा, हुक्का पार्लर, पत्त्याचे क्लब, अमली पदार्थांची विक्री, मसाज पार्लर या अवैध धंद्यांवर कारवाई करण्याबाबत मी पोलिस आयुक्तांना यापूर्वी पत्रही दिलं आहे आणि विधानसभेतही यासंदर्भात आवाज उठवला आहे. तसंच कल्याणीनगरमधील रहिवाशांसोबत पोलिस आयुक्त साहेबांची प्रत्यक्ष भेट घेउनही त्यांच्या निदर्शनास हा प्रकार आणून दिला आहे. शिवाय यापुढेही या अवैध व्यवसायांना माझा नेहमीच विरोध असेल. परंतु एखाद्या अपघाताशी कोणताही संबंध नसताना नाव जोडणं हे चुकीचं आणि बदनामीकारक आहे. सूज्ञ नागरीक या अपप्रचाराला बळी पडणार नाहीत असा विश्वास आमदार सुनिल टिंगरे यांनी व्यक्त केलाय.