Video: 'मी सगळ्यांना आतमध्ये घालेन', पूजा खेडकर यांच्या आईची पुणे पोलिसांना दमदाटी

वाहतूक नियमांचे उल्लंघन केल्याप्रकरणी पूजा खेडकर यांच्या गाडीवर कारवाई करण्यासाठी पुणे पोलीस त्यांच्या घरी गेले होते

पुणे : पूजा खेडकर यांची २०२३ बॅचच्या IAS अधिकारी प्रशिक्षणार्थी म्हणून त्यांची पुण्यात नियुक्ती करण्यात आली होती. मात्र नियुक्ती झाल्यापासूनच त्यांनी अधिकाऱ्यांकडे वेगवेगळ्या मागण्या करण्यास सुरुवात केली. इतकच नाही तर एका वरिष्ठ अधिकाऱ्याचे अँटी चेंबर बळकावले, स्वतःच्या खाजगी गाडीवर लाल दिवा मिरवला. वरिष्ठ अधिकाऱ्यांनी सांगूनही पाहिले. मात्र तरीही वर्तणुकीत बदल झाला नाही. अखेर पुण्याचे जिल्हाधिकारी सुहास दिवसे यांनी मुख्य अप्पर सचिवांकडे पत्र लिहीत तक्रार केली. आणि त्यानंतर प्रशिक्षणार्थी असलेल्या पूजा खेडकर यांची उचलबांगडी करण्यात आली आहे. पूजा खेडकर यांची वाशिम जिल्ह्यात बदली करण्यात आली आहे. 

त्यानंतर वाहतूक नियमांचे उल्लंघन केल्याप्रकरणी पुणे पोलीस पूजा खेडकर यांच्यावर कारवाई करणार असल्याची माहिती समोर आली. त्यांच्या गाडीवर कारवाई करण्यासाठी पोलीस त्यांच्या पुण्यातील घरी गेले होते. मात्र पूजा खेडकर यांच्या आईने पोलिसांना घरात येऊ दिले नाही. बंगल्याच्या गेटला आतून कुलूप लावलं असून आईने मी सगळ्यांना आतमध्ये घालेन असे म्हणत पोलिसांनाच दमदाटी केल्याचा प्रकार समोर आला आहे. 

'मी सगळ्यांना आतमध्ये घालेन', पूजा खेडकर यांच्या आईची पुणे पोलिसांना दमदाटी#PunePolice#poojakhedkar#Audi#trafficrulespic.twitter.com/55NeNqkBdf

— Lokmat (@lokmat) July 11, 2024

पूजा खेडकर 3 जून रोजी पुणे जिल्ह्यात परिविक्षाधीन सहाय्यक जिल्हाधिकारी म्हणून रुजू झाल्या. मात्र रुजू होण्यापूर्वीच त्यांनी जिल्हाधिकारी आणि निवासी उपजिल्हाधिकाऱ्यांना व्हाट्सअपद्वारे निरोप देऊन त्यांच्यासाठी स्वतंत्र बैठक व्यवस्था, गाडी, निवासस्थान व शिपाई याबाबत वारंवार मागणी केली. प्रत्यक्षात कोणत्याही आयएएस किंवा आयपीएस अधिकाऱ्यांना दोन वर्षाचा प्रोबेशन काळ पूर्ण करावा लागतो. त्यादरम्यान त्यांना विविध विभागात काम करावे लागते. या सर्व कामाचा अनुभव आल्यानंतरच प्रत्यक्षात त्यांची नियुक्ती केली जाते. मात्र पूजा खेडकर यांनी प्रोबेशन काळातच जिल्हाधिकाऱ्यांकडे विविध मागण्यांची जंत्रीच सुरू केली. 

पूजा खेडकर कोण आहेत? 

पूजा खेडकर या २०२३ च्या बॅचच्या आयएएस अधिकारी आहेत. अहमदनगर जिल्ह्यातील पाथर्डी येथील त्या रहिवाशी आहेत. माजी सनदी अधिकारी दिलीप खेडकर यांच्या त्या कन्या आहेत. दिलीप खेडकर हे प्रदूषण विभागाचे आयुक्त राहिलेले आहेत. तर त्यांचे आजोबा (आईचे वडील) जगन्नाथराव बुधवंत हे देखील आयएएस अधिकारी होते.