Narendra Modi in Pune Metro: पूर्वी प्रकल्पांचे भूमिपूजन व्हायचे; उद्घाटनाचा पत्ताच नसायचा! मोदीं कोणाला बोलले?

पंतप्रधान मोदी; छत्रपती शिवाजी महाराजांच्या पुतळ्याचे अनावरण; हिरवा झेंडा दाखवत पुणे मेट्रोतून सात मिनिटांची केली सफर

लोकमत न्यूज नेटवर्क
पुणे : पूर्वी प्रकल्पांचे केवळ भूमिपूजन व्हायचे; मात्र उद्घाटन कधी होणार, याचा पत्ता नसायचा. योजना वेळेत पूर्ण करता येतात, हे आज अधोरेखित झाले, अशा शब्दांत पंतप्रधान नरेंद्र मोदी यांनी अप्रत्यक्षपणे काँग्रेस सरकारच्या काळातील प्रलंबित प्रकल्पांवर टीका केली. भारताच्या जगभरातील वाढत्या प्रभावामुळे युक्रेनमध्ये अडकलेल्या विद्यार्थ्यांना भारतात आणणे शक्य झाल्याचेही त्यांनी सांगितले.

पंतप्रधानांनी रविवारी येथे मेट्रोच्या उद्घाटनासह विविध विकासकामांचे लोकार्पण केले. सिम्बायोसिस विद्यीपाठाच्या   सुवर्णमहोत्सवी सोहळ्यात ‘सिम्बायोसिस आरोग्य धाम’चे उद्घाटन केले. 

पुणे महापालिकेतील छत्रपती शिवाजी महाराजांच्या सिंहासनाधिष्ठित पुतळ्याचे अनावरण मोदी यांच्या हस्ते झाले. गरवारे महाविद्यालय ते आनंद नगरपर्यंतचा सात मिनिटांचा प्रवास त्यांनी मेट्रोतून केला. एमआयटी कॉलेजच्या मैदानावर सभेत मोदी म्हणाले, आधुनिक सुविधांसाठी वेग व प्रमाण महत्त्वाचे असते. आपल्याकडे अनेक दशके महत्त्वाच्या योजना पूर्ण होण्यास विलंब व्हायचा. सरकारची उदासीनता, समन्वयाच्या अभावामुळे कामे प्रलंबित राहिली. कामे रखडली की त्यांचे महत्त्वही कमी होते. म्हणूनच ‘पीएम गतीशक्ती योजने’अंतर्गत कामांना वेग दिला.  कच्च्या तेलासाठी इतर देशांवरील अवलंबित्व कमी करायचे आहे. इथेनॉल, बायो-फ्युएलवर लक्ष केंद्रित केल्याने ऊस उत्पादकांना फायदा होईल.
    
गेल्या काही वर्षांतील भारताच्या जगभरातील वाढत्या प्रभावामुळेच युक्रेनमध्ये अडकलेल्या हजारो विद्यार्थ्यांना ‘ऑपरेशन गंगा’ अंतर्गत मायभूमीत परत आणणे सहज शक्य झाले. या उलट जगातील इतर मोठ्या राष्ट्रांना युक्रेनमध्ये अडकलेल्या आपल्या नागरिकांना सोडवण्यासाठी अनेक समस्यांचा सामना करावा लागला आहे.
    - नरेंद्र मोदी, पंतप्रधान 

श्रीमंतांनीही लावून घ्यावी मेट्रोची सवय
श्रीमंत, उच्चभ्रू असाल तरी सुजाण नागरिकांनी मेट्रोची सवय लावून घ्यावी, असे आवाहन पंतप्रधान नरेंद्र मोदी यांनी केले. मेट्रोमुळे प्रवास सोपा होईल, वाहतूक कोंडी आणि प्रदूषण कमी होईल. २५ हजार टन कार्बनडाय ऑक्साईडचे उत्सर्जन रोखता येईल.
शहरीकरणाचा वेग झपाट्याने वाढत असल्याने २०३०पर्यंत शहरी लोकसंख्या ६० कोटींचा टप्पा पार करेल. शहरांमध्ये उड्डाणपुलांची संख्या मर्यादेपेक्षा जास्त वाढवता येत नाही. त्यामुळे सार्वजनिक वाहतूक व्यवस्था हाच एकमेव सशक्त पर्याय आहे, असे ते म्हणाले.

५ तास १० मिनिटे पंतप्रधान पुण्यात होते
सकाळी १०.२५ : 
दिल्लीहून खास विमानाने लोहगाव येथे आगमन
१०.४५ : हेलिकॉप्टरने कृषी महाविद्यालय मैदानावर आगमन
११.०५ : मोटारीने पुणे महापालिकेत आगमन. छत्रपती शिवाजी महाराजांच्या पुतळ्याचे अनावरण व नगरसेवकांची भेट
११.३० : पालिकेतून मोटारीने गरवारे महाविद्यालय स्टेशनवर. कोनशिलेचे अनावरण करून मेट्रो प्रकल्पाची पाहणी. स्वत: तिकीट काढून मेट्रो स्टेशनवर गेले. हिरवा झेंडा दाखवून मेट्रोत बसले. 
दुपारी १२.०० : एमआयटी कॉलेज येथे जाहीर सभेच्या ठिकाणी पोहोचले. विविध विकासकामांची उद्घाटने केली. 
१.५२ :  मोटारीने कृषी महाविद्यालयात आले. तेथून हेलिकॉप्टरने लवळे येथील सिम्बायोसिस विद्यापीठात पोहोचले. 
३.३५ : हेलिकॉप्टरने लोहगाव विमानतळावर पोहोचले. तेथून दिल्लीकडे रवाना झाले.

पुणे मेट्रोच्या गरवारे महाविद्यालय ते वनाज या ५ कि. मी. व पिंपरी महापालिका ते फुगेवाडी या ७ कि. मी. मार्गाचे उद्घाटन झाले.