खुनाच्या गुन्ह्यातून गज्या मारणेची निर्दोष मुक्तता

लोकमत न्यूज नेटवर्क

पुणे : जमीन खरेदी-विक्रीच्या व्यवहारातील टोळीचे आर्थिक वर्चस्व कायम ठेवण्यासाठी तसेच पूर्वीच्या गुन्ह्याचा बदला घेण्यासाठी पप्पू गावडे खून प्रकरणात पौड येथे गुन्हा दाखल असलेल्या गजानन मारणे व अन्य आरोपींची पुणे येथील विशेष मोक्का न्यायालयाने निर्दोष मुक्तता केली आहे.

विशेष मोक्का न्यायाधीश ए. वाय. थत्ते यांनी हा निकाल दिला असून पुराव्याअभावी आरोपींची मुक्तता केली असल्याचे मत न्यायालयाने नोंदवले आहे. या प्रकरणात आरोपीतर्फे अॅड. सुधीर शहा, अॅड. विजयसिंह ठोंबरे, अॅड. विपुल धुशिंग, अॅड. जितू सावंत, अॅड. विद्याधर कोशे, अॅड. भरेकर यांनी कामकाज पाहिले.

गजानन मारणे (वय ४९), पप्पू ऊर्फ अतुल लक्ष्मण कुडले (वय ३०), रूपेश कृष्णराव मारणे, संतोष विश्वनाथ शेलार, सुनील नामदेव बनसोडे, गणेश नामदेव हुंडारे (वय ३२), प्रदीप दत्तात्रय कंधारे (वय २८), अनंता ज्ञानोबा कदम (वय ३०), बाब्या ऊर्फ श्रीकांत संभाजी पवार (वय २७), बापू श्रीमंत बागल (वय ३०), गोरक्षनाथ तुकाराम हाळंदे (वय ३०), यशवंत ऊर्फ बाळा दासू बोकेफोडे (वय ३०), उमेश नागू टेमधरे, सतीश ऊर्फ आबा शिळीमकर अशी निर्दोष सुटका केलेल्यांची नावे आहेत. याप्रकरणी नीलेश ज्ञानेश्वर जाधव यांनी पौड पोलीस स्टेशन येथे फिर्याद दिली होती.

मौजे लवळे गावाच्या हद्दीतील गावडे वस्तीजवळ ३ नोव्हेंबर २०१४ मध्ये जमीन खरेदी-विक्रीच्या व्यवहारातील टोळीचे आर्थिक वर्चस्व कायम ठेवण्यासाठी तसेच पूर्वीच्या गुन्ह्याचा बदला घेण्यासाठी पप्पू ऊर्फ संतोष हिरामण गावडे याचा खून झाला होता. नीलेश घायवळ आणि गजानन मारणे हे दोघे पूर्वीपासून आर्थिक फायद्यासाठी गुन्हेगारी टोळ्या चालवितात. या दोन्ही टोळ्यांमध्ये फार पूर्वीपासून कोथरूड व मुळशी तालुक्यातील जमिनीचे खरेदी-विक्रीचे जुने वाद आहे. या वादातून मारणे व घायवळ यांच्या टोळ्यांनी एकमेकांवर खुनी हल्ले केले आहेत. २००८ मध्ये नीलेश घायवळ व पप्पू ऊर्फ संतोष गावडे यांच्यावर गजानन मारणे, पप्पू कुडले व त्यांच्या साथीदारांनी फायरिंग करून व कोयत्याने वार करून जीवे ठार मारण्याचा प्रयत्न केला होता.

त्यामध्ये पप्पू गावडे याने दिलेल्या फिर्यादीवरून कोथरूड पोलीस ठाण्यात गुन्हा दाखल करण्यात आला होता. या गुन्ह्यात साक्ष दिली तर तुला संपवून टाकू अशी धमकी त्यांनी पप्पू गावडे याला दिली होती. त्याप्रमाणे त्यांनी पप्पूचा काटा काढला. यामध्ये आरोपी श्रीकांत ऊर्फ बाब्या संभाजी पवार याने गुन्ह्यात वापरलेला चाॅपर, कोयता व इतर १ कोयता जप्त करण्यात आला होता. यापूर्वीही अमोल बधेच्या खून प्रकरणातून न्यायालयाने गजानन मारणे याच्यासह २० साथीदारांची निर्दोष मुक्तता केली होती.

.......