International Women’s Day 2023| पोल डान्सकडे बघण्याचा ‘दृष्टिकोन’ बदलावा- नूपुर चौधरी

या साहसी प्रकाराला ऑलिम्पिकमध्ये समाविष्ट करण्यास मान्यता मिळण्यासाठी इंटरनॅशनल पोल फेडरेशनचे प्रयत्न सुरू असल्याचे त्यांनी सांगितले...

पुणे : पोल डान्स म्हणजे एखाद्या हिंदी चित्रपटांमध्ये आयटम साँग किंवा डान्स बारमध्ये अत्यंत तोकड्या कपड्यांमध्ये डान्स करणाऱ्या तरुणी अशीच काहीशी प्रतिमा डोळ्यासमोर येते. मात्र, इतकंच पोलबद्दलचे आपले अल्प ज्ञान. पोल डान्सकडे कलेबरोबरच स्पोर्ट, फिटनेस आणि थेरपी म्हणून बघण्याचा दृष्टिकोन दिला आहे, तो पुण्यातील पोल आर्टिस्ट नूपुर चौधरी यांनी. या साहसी प्रकाराला ऑलिम्पिकमध्ये समाविष्ट करण्यास मान्यता मिळण्यासाठी इंटरनॅशनल पोल फेडरेशनचे प्रयत्न सुरू असल्याचे त्यांनी सांगितले.

जागतिक महिला दिनानिमित्त नूपुर चौधरी यांची कहाणी इतर महिलांसाठी नक्कीच प्रेरणादायी आहे. नूपुर यांनी वयाच्या ३२ व्या वर्षी पोल डान्स शिकण्याची इच्छा व्यक्त केली. तेव्हा आई आणि पतीने पाठिंबा दिला; पण विरोध केला तो वडिलांनी. हे काय आता शिकायची गरज आहे का? असं त्यांचं म्हणणं होतं. मित्रमंडळींनीही कुत्सितपणे मग आता तू स्टिपर होणार का? असे टोमणे मारले. सुरुवातीला नूपुर जेव्हा व्हिडीओ तयार करून कुटुंबातील सर्वांना दाखवायच्या, तेव्हा त्यांचे वडील कधीच ते व्हिडीओ पाहात नसतं. पण, जेव्हा नूपुर यांनी आंतरराष्ट्रीय स्पर्धेत पदक मिळविलेले पाहिले आणि त्यांचा विरोध मावळला. पोल डान्सपासून पोल फिटनेसकडे सर्वसामान्यांचा दृष्टिकोन बदलण्याचा त्यांचा प्रवास म्हणावा तितका सुखकर नव्हता. हा प्रवास नूपुर चौधरी यांनी ‘लोकमत’शी बोलताना कथन केला.

त्या म्हणाल्या, पुण्यात पोल डान्सचे प्रशिक्षण देणारे कुणी नव्हते. मी तेव्हा आठवड्यातून एकदा मुंबईला केवळ पोल डान्सचे प्रशिक्षण घ्यायला जायचे. दरम्यान, पोल डान्स शिकत असतानाच मला दुखापत झाली. हाताचं हाड सरकल्याने काहीच करता येणं शक्य नव्हतं. फिजिओथेरपिस्ट यांनी आता तुम्ही पोल डान्स करू शकणार नसल्याचे सांगितले. मी नैराश्यात गेले. मात्र, दुसऱ्या एका डॉक्टरांनी मला आत्मविश्वास दिल्याने बरी होऊन मी पुन्हा पोल डान्स करायला लागले. दुबई येथे जाऊन मी पोल डान्सचे अधिकृत प्रशिक्षण घेतले. आंतरराष्ट्रीय पोल स्पर्धेत ऑनलाइन सहभागी होत भारताचे प्रतिनिधित्व केले आणि रौप्यपदक पटकावले. इंडिया गॉट टॅलेन्टमध्येही मी भाग घेतला आणि परीक्षकांनी माझे खूप कौतुक केले.

पोल डान्समध्ये मन आणि देहाचे कॉर्डिनेशन खूप आवश्यक आहे. सोशल मीडियावरील माझ्या फोटो आणि व्हिडिओवर लोकं कौतुक करताना दिसत आहेत. हेच यश असल्याचे मी मानते.

- नूपुर चौधरी, पोल आर्टिस्ट