चाकू दाखवून घाबरविणे पडले महागात; तोच चाकू खुपसून केला खून, कोंढव्यातील घटना

रस्त्यावरून पायी जाताना आरोपीने शिवीगाळ करून वाद निर्माण केला

पुणे : एकमेकांकडे पाहण्यावरुन त्यांच्यात वाद झाला. तेव्हा त्याने दुसऱ्याला घाबरविण्यासाठी चाकू दाखविला. लाथाबुक्क्यांनी मारहाण करुन चाकूने वार केले. तोच चाकू हिसकावून घेऊन त्याने त्याच्या पोटात खूपसला. त्यात त्याचा मृत्यु झाला. पोलिसांनी खूनाचा गुन्हा दाखल केला आहे.

अहमद रजा खान (वय २१, रा. युनिटी पार्क, कोंढवा) असे खून झालेल्या तरुणाचे नाव आहे. याबाबत त्यांचा भाऊ सलमान फारुख खान (वय २३, रा. कोंढवा) यांनी कोंढवा पोलीस ठाण्यात फिर्याद दिली आहे. त्यानुसार पोलिसांनी सलिम इब्राहिम खान (वय ४९, रा. नवाजिश चौक, कोंढवा) याच्यावर खूनाचा गुन्हा दाखल केला आहे. या घटनेत सलिमही जखमी झाला असून त्यांच्यावर ससून रुग्णालयात उपचार करण्यात येत आहे. ही घटना कोंढव्यातील गरीब नवाज हॉस्पिटलसमोरील रोडवर मंगळवारी सकाळी ९ वाजता घडली.

याबाबत पोलिसांनी दिलेल्या माहितीनुसार, फिर्यादी यांचा लहान भाऊ अहमद खान हा मंगळवारी गरीब नवाज हॉस्पिटल येथून पायी जात होता. त्यावेळी त्यांच्या ओळखीचा सलिम खान याने अहमद याच्याकडे पाहून शिवीगाळ केली. त्याबाबत त्याने विचारणा केली असता त्यांच्यात वाद झाला. तेव्हा अहमद याने सलीम खान याला लाथाबुक्क्यांनी मारहाण करुन चाकूने पोटावर व हातावर वार केले. जखमी झालेल्या सलिम याने त्याच्याकडील चाकू हिसकावून घेत त्याच चाकूने अहमद याच्या पोटात सपासप वार केले. गंभीर जखमी झालेल्या अहमद याचा मृत्यु झाला. या घटनेत सलिमही जखमी झाला. त्याच्यावर उपचार करण्यात येत आहे. सलिम खान याच्या फिर्यादीवरुन मृत्यु पावलेल्या अहमद खान याच्यावर गुन्हा दाखल केला आहे. सहायक पोलीस निरीक्षक आर एस मोहिते तपास करीत आहेत.