शंभरावर घरफोड्या करणाऱ्या ‘जयड्या’कडून १३ लाखांचे दागिने जप्त

पुणे : शहराच्या विविध भागांत घरफोडी करणाऱ्या सराईत घरफोडी चोरट्याला गुन्हे शाखेच्या युनिट ५ च्या पथकाने अटक केली. त्याच्याकडून १२ लाख ६० हजार रुपयांचे २८ तोळे सोन्याचे दागिने जप्त करण्यात आले.

जयवंत गोधर्वन गायकवाड ऊर्फ जयड्या (वय ३२, रा. आंबेडकरवस्ती, औंध) असे अटक केलेल्याचे नाव आहे़

गुन्हे शाखेचे युनिट ५ चे अधिकारी व कर्मचारी पेट्रोलिंग करीत असताना कारागृहातून सुटलेला आरोपी जयवंत गायकवाडने मोठी घरफोडी केली असून, तो सोलापूरला जाण्याच्या तयारीत असल्याची माहिती हवालदार अजय गायकवाड यांना मिळाली. त्यानुसार पोलिसांनी सापळा रचून त्याला ताब्यात घेतले.

चौकशीत त्याने शिवाजीनगर गावठाणात घरफोडी केल्याची कबुली दिली. याबाबत शिवाजीनगर पोलीस ठाण्यात तपासणी केली असताना २२ मार्चला शिवाजीनगर गावठाणात घरफोडी करुन १२ लाख ६० हजार रुपयांचे २८ तोळे सोन्याचे लंपास केले होते. सहायक पोलीस निरीक्षक प्रसाद लोणारे अधिक तपास करीत आहेत. ही कामगिरी सहायक पोलीस निरीक्षक प्रसाद लोणारे, पोलीस उपनिरीक्षक सोमनाथ शेंडगे, प्रमोद टिळेकर, दीपक लांडगे, रमेश साबळे, दयाराम शेगर, संजय दळवी, स्नेहल जाधव यांच्या पथकाने केली.

चौकट

‘रेकॉर्ड’वरील सराईत गुन्हेगार

जयवंत ऊर्फ जयड्या गायकवाड हा पोलिसांच्या रेकॉर्डवरील सराईत गुन्हेगार आहे. गायकवाडने शहराच्या वेगवेगळ्या भागांत घरफोड्या केल्या असून, आतापर्यंत त्याने शंभरापेक्षा जास्त घरफोडीचे गुन्हे केले आहेत. चतु:श्रृंगी पोलीस ठाण्याचे पोलीस उपनिरीक्षक प्रेम वाघमारे व त्यांच्या पथकाने त्याला नोव्हेंबरमध्ये अटक केली होती. त्या वेळी त्याच्याकडून तीन घरफोडीचे गुन्हे उघडकीस आणले होते. या गुन्ह्यांतून तो नुकताच जामिनावर बाहेर आला. त्यानंतर त्याने शिवाजीनगरमध्ये घरफोडी केली. परंतु, त्यातील दागिन्यांची विल्हेवाट लावण्यापूर्वीच पोलिसांनी त्याला पुन्हा पकडून चोरलेला ऐवज हस्तगत केला.