कदमवाकवस्ती महिला सरपंचांना मारहाण

लोकमत न्यूज नेटवर्क

लोणी काळभोर : कदमवाकवस्ती (ता. हवेली) येथे लसीकरण दरम्यान झालेल्या शाब्दिक बाचाबाचीचे पर्यावसान भांडणात झाल्याने ते सोडवण्यासाठी गेलेल्या महिला सरपंचांना शिवीगाळ करून त्यांना मारहाण करण्यात आली. तसेच त्यांचा विनयभंग केल्याची धक्कादायक घटना कदमवाकवस्ती येथे घडली. याप्रकरणी परस्परविरोधी तक्रारी दाखल करण्यात आल्या आहेत. पोलिसांनी एकास अटक केली आहे.

याप्रकरणी सरपंच गौरी चित्तरंजन गायकवाड (वय ४०, रा. पांडवदंड रोड, कदमवाकवस्ती) यांनी दिलेल्या फिर्याद दिली. त्यानुसार सुजित सुभाष काळभोर (वय ३३, रा. कदमवाकवस्ती) याला अटक करण्यात आली आहे. वरिष्ठ पोलीस निरीक्षक राजेंद्र मोकाशी यांनी दिलेल्या माहितीनुसार, शुक्रवारी (दि.३) कदमवाकवस्तीमध्ये आरोग्य विभागाच्या वतीने एंजल हायस्कूल, माळवाडी जिल्हा परिषद शाळा व कदमवस्ती जिल्हा परिषद शाळा येथे कोविड-१९ लसीकरणाचे आयोजन करण्यात आले होते. लसीकरण सुस्थितीत पार पाडण्यासाठी सरपंच गौरी गायकवाड या एंजल हायस्कूल, संभाजीनगर येथे उपस्थित होत्या.

११ वाजण्याच्या सुमारास सुजित काळभोर हा तेथे आला. त्यावेळी तेथे उपस्थित असणारा अविनाश ऊर्फ पप्पू बडदे यांच्यामध्ये शाब्दिक बाचाबाची सुरू झाली. सुजित काळभोर याने अविनाशच्या कानाखाली मारली. हे पाहून सरपंच या नात्याने त्यांच्यातील वाद मिटविण्यासाठी गायकवाड तेथे गेल्या असता त्यांनाही सुजित याने शिवीगाळ करत कानाखाली मारून जमिनीवर पाडले. त्यानंतर लसीकरणासाठी आलेल्या महिलांनी गायकवाड यांना सुजितच्या तावडीतून सोडवण्याचा प्रयत्न केला. त्यांना न जुमानता त्याने सरपंचाचा डाव्या हाताला धरून विनयभंग केला.

सुजित काळभोर याने दिलेल्या फिर्यादीनुसार, सकाळी लसीकरणासाठी गेला असता पप्पू बडदे त्याला तू थांब म्हणाला यावरून वाद निर्माण झाला. त्यानंतर तेथे सरपंच गौरी गायकवाड आल्या त्यांनी कानशिलात लगावल्याने हाणामारी झाली. हे पाहून तेथे सचिन अरविंद काळभोर, महेश ज्ञानेश्वर काळभोर हे आले व सर्वांनी त्यास हाताने मारहाण केली. पुढील तपास पोलीस उपनिरीक्षक अमृता काटे या करत आहेत.