कवठे येमाई हिट अँड रन: चुकीच्या बाजूने येत भरधाव गाडीची दुचाकीला धडक, तरुणाचा जागीच मृत्यू

पुणे येथे र्पोशो अपघात प्रकरण गाजत असताना शिरूर तालुक्यातही अशी घटना घडली आहे....

कवठे येमाई (पुणे) : कवठे यमाई (ता. शिरूर) येथे एका मित्रांच्या वाढदिवसाची पार्टी करून ढाब्यावरून उलट्या दिशेने येणाऱ्या चारचाकी गाडीने धडक दिल्याने एका निष्पाप तरुण मजुराचा जागीच मृत्यू झाल्याची घटना घडली आहे. पुणे येथे र्पोशो अपघात प्रकरण गाजत असताना शिरूर तालुक्यातही अशी घटना घडली आहे.

कवठे यमाई येथे अष्टविनायक महामार्गावर एका धाब्याच्या जवळ हा अपघात बुधवारी सायंकाळी सात वाजेच्या सुमारास झाला. फिर्यादी अमोल गोरक्ष येठेकर (वय 34 वर्षे, व्यवसाय शेती, रा. मु. पो. गुंडेगाव, अहिल्यानगर) यांनी फिर्याद दिली असून यामधे दिपक जालिंदर येठेकर (वय ३३ ) याचा मृत्यू झाला आहे.

याबाबत पोलिसांनी दिलेल्या माहितीनुसार, कवठे येमाई - पारगाव रस्त्यावर फिर्यादी यांचा चुलत भाऊ दिपक हा मोटार सायकल चालवित जेवणाचा डब्बा आणण्याकरिता कामगार जात होता. त्यावेळी कवठे येमाई बाजूने पारगावकडे राँग साईडने धाब्यावरून येणाऱ्या इको गाडीने मोटार सायकलला जोरदार धडक दिली. त्यामध्ये दिपक येठेकर याचा मृत्यू झाला असून पाठीमागे बसलेला रंगनाथ आढाव यांना जखमी झाले आहे.

चारचाकी गाडी चालविणारे तरुण हे एका मित्रांच्या वाढदिवसाची पार्टी असल्याने धाब्यावर मद्य सेवन करीत फार्महाऊस वर बकऱ्यावर ताव मारायला निघाल्याची चर्चा परीसरात आहे. त्यामुळे वाढदिवसाची पार्टी मात्र एका गरीब मजुराच्या जीवावर बेतली असून गाडी चालक पसार झाला आहे. गाडीचा मालक कोण? चालक कोण? याचा तपास पोलिस करून आरोपीला गजाआड करण्याची मागणी नागरिकांकडून केली जात आहे . या गुन्हयाचा तपास सहाय्यक पोलीस निरीक्षक अमोल पन्हाळकर करीत आहेत