Pune: ढोल-ताशा पथकातील मुलाचे अपहरण करून केला खून; दोघांना अटक, दहा जणांवर गुन्हा

याप्रकरणी कोंढवा पोलिसांनी दोन सराईत गुन्हेगारांना अटक केली आहे...

पुणे : ढोल-ताशा पथकात सरावासाठी गेलेल्या एका अल्पवयीन मुलाचे अपहरण करून खून केल्याची घटना उघडकीस आली आहे. प्रतिस्पर्धी टोळीला माहिती देत असल्याच्या संशयावरून हा खून केल्याचे प्राथमिक तपासात समोर आले आहे. याप्रकरणी कोंढवा पोलिसांनी दोन सराईत गुन्हेगारांना अटक केली आहे.

साईराज लोणकर (वय २५, रा. कोंढवा खुर्द) आणि ओंकार कापरे (२५, रा. कोंढवा) अशी अटक आरोपींची नावे आहेत. याप्रकरणी कोंढवा पोलिस ठाण्यात दहा ते अकरा जणांविरोधात गुन्हा दाखल केला आहे. तसेच दोन अल्पवयीन मुलांना ताब्यात घेण्यात आले आहे.

अधिक माहितीनुसार, अल्पवयीन मुलगा कोंढवा येथील शिवनेरीनगर भागात राहतो. शनिवारी रात्री तो ढोल-ताशा पथकात सरावासाठी गेला होता. रात्री उशिरापर्यंत तो घरी न आल्याने रविवारी त्याच्या कुटुंबीयांनी तो बेपत्ता झाल्याची तक्रार कोंढवा पोलिसांत दिली. पोलिसांनी मुलगा अल्पवयीन असल्याने तत्काळ अपहरणाचा गुन्हा दाखल करून तपास सुरू केला.

दरम्यान, अल्पवयीन मुलासोबत गेलेला आणखी एकजण बेपत्ता झाला असून, तो घरी आल्याची माहिती पोलिसांना मिळाली. त्याच्या पायाला जखमा झाल्या होत्या. संबंधित अल्पवयीन मुलाचे लोणकर आणि कापरे यांनी अपहरण करून त्याला सासवड येथे नेले. त्या ठिकाणी त्याला बेदम मारहाण करून गंभीर जखमी केले. मारहाणीत अल्पवयीन मुलाचा मृत्यू झाला. अधिक तपास पोलिस निरीक्षक संदीप भोसले करत आहेत.