तरूणाचे अपहरण करून मारहाण

घोडेगाव : येथील कोटमदरा फाट्यावर रहाणाऱ्या तरूणाला चौंघानी मोटारीत जबरदस्तीने बसवुन त्याचे अपहरण केल्याची घटना सोमवारी (दि १२) घटली. त्याला निरगुडसर गावाच्या हद्दीतील डोंगरावर नेऊन तेथे मारहाण करण्यात आली.

अक्षय जयसिंग काळे असे अपहरण करण्यात आलेल्या युवकाचे नाव आहे. त्याने दिलेल्या फिर्यादीनुसार गुन्हा दाखल करण्यात आला आहे. अक्षय काळे हे पानमळा कोटमदरा येथे आपले हॉटेल भाग्यश्री उघडण्यासाठी गेला होता. यावेळी एक मोटार हॉटेल जवळ थांबली. गाडीतुन तीन व्यक्ती खाली उतरले व एकजण गाडीमध्ये बसून होता. खाली उतरलेल्या तीन व्यक्तींनी अक्षय काळे यांना तू कुठला भाई आहे असे म्हणत लाथाबुक्क्यांनी मारहाण करत गाडीमध्ये बसवले. गाडी मंचरकडे घेऊन मोरडेवाडी कॅनॉल मार्गे अवसरी फाट्यावरुन निरगुडसर गावाच्या अलीकडे असलेल्या डोंगरावर नेली. तेथे अक्षय काळे यांना चौंघानी मारहाण केली. सागर जाधव (रा.निघोज ता.पारनेर जि.अहमदनगर) असे एका आरोपीचे नाव चर्चेतून अक्षय काळे यांना समजले. त्यानंतर त्यांनी अक्षय काळे यांना पुन्हा गाडीत बसवून मुळेवाडी रस्त्यावर सोडले. पोलिसांत तक्रार दिल्यास जीवे मारण्याची धमकी दिली. अक्षय काळे यांनी घडलेला प्रकार त्यांच्या वडिलांना फोन करुन सांगितला. याप्रकरणी सागर जाधव व इतर तीन जणांविरोधात घोडेगांव पोलिस ठाण्यात गुन्हा दाखल करण्यात आला आहे