खेड तालुक्यात पुन्हा बिबट्याचा हल्ला; एक जण गंभीर जखमी

जखमी झालेल्या व्यक्तीला उपचारासाठी रुग्णालयात दाखल करण्यात आले आहे

ठळक मुद्देनख्या व दाताच्या खोलवर जखमा झाल्या असून झाला मोठा रक्तस्राव

राजगुरूनगर : खेड तालुक्याच्या वडगाव-पाटोळे, दोंदे, कडूस परिसरात बिबट्याचा उपद्रव वाढला आहे. गेल्या काही दिवसांपासून बिबट्याच्या माणसांवर हल्ला करण्याच्या घटना वारंवार घडत आहेत. बुधवारी सकाळी वडगाव-पाटोळे येथील गायकवाड वस्तीत सुभाष गायकवाड यांच्यावर बिबट्याने हल्ला करून गंभीर जखमी केले. जखमी झालेल्या गायकवाड यांना उपचारासाठी रुग्णालयात दाखल करण्यात आले आहे.

वडगाव - पाटोळे, दोंदे, कडूस परिसरात बिबट्याच्या धुमाकुळाने ग्रामस्थ भयभीत झाले आहेत. गेल्या काही दिवसात बिबट्याच्या माणसांवर हल्ला करण्याच्या अनेक घटना घडल्या आहेत. हल्ल्याच्या या घटना ताज्या असताना आज सकाळी सहा वाजता वडगाव-पाटोळे येथे सुभाष निवृत्ती गायकवाड हे घराकडे जात असताना दबा धरलेल्या बिबट्याने गायकवाड वस्तीतील चासकमान धरणाच्या डाव्या कालव्यानजीक लक्ष केले.

या हल्ल्यात गायकवाड गंभीर जखमी झाले आहेत. नख्या व दाताच्या खोलवर जखमा झाल्या असून मोठा रक्तस्राव झाला आहे. परिसरात बिबट्याकडून माणसांवर वारंवार हल्ला करण्याचे प्रकार घडू लागल्याने परिसरात दहशत पसरली आहे.