भीषण! कारला धडकून लक्झरी बस पलटली; हॉटेलच्या पार्किंगमध्ये घुसली, २५ प्रवासी जखमी

कारच्या धडकेनंतर उलटलेली बस थेट हॉटेलच्या पार्किंगमध्ये घुसली; कार चालकाचा जागीच मृत्यू

पुणे: पुणे-अहमदनगर महामार्गावर भीषण अपघात झाला आहे. कारच्या धडकेनंतर लक्झरी बस पलटली. काल रात्री सव्वा अकराच्या सुमारास शिरुर येथील बजरंगवाडी येथे झालेल्या अपघातात २५ प्रवासी जखमी झाले. कारची धडक बसल्यानंतर बस चालकाचं नियंत्रण सुटलं. ती एका बाजूला उलटली आणि घासत घासत एका हॉटेलच्या पार्किंगपर्यंत गेली. त्यामुळे पार्किंगमधील काही कारचं नुकसान झालं. हा अपघात सीसीटीव्हीत कैद झाला आहे. 

पुणे-अहमदनगर महामार्गावर भीषण अपघात; कारच्या धडकेनंतर उलटलेली बस थेट हॉटेलसमोरील पार्किंगमध्ये https://t.co/CbvSFUjpi9pic.twitter.com/mOh6oUUNhn

— Lokmat (@lokmat) April 11, 2022

पुणे-अहमदनगर महामार्गावर पुण्याच्या दिशेनं जाणाऱ्या रस्त्यावर एका कार चालकाचं नियंत्रण सुटलं. त्यानंतर कार दुभाजकावर धडकली. अपघात इतका भीषण होता की, कार पुढे जाऊन अहमदनगरच्या दिशेनं चाललेल्या लक्झरी बसला धडकली. धडक जोरात बसल्यानं बस उजव्या बाजूला उलटली. त्यानंतर ती रस्त्याला घासत एका रस्त्याच्या शेजारी असलेल्या रॉयल पॅलेसच्या दरवाज्यापर्यंत पोहोचली. हॉटेलसमोरच्या पार्किंगमध्ये अनेक कार उभ्या होत्या. पलटलेली बस कार्सना धडकली. त्यामुळे काही कार्सचं नुकसान झालं. या अपघातात कार चालकाचा जागीच मृत्यू झाला. तर २५ प्रवासी जखमी झाले.