श्रीमंत बाजीराव पेशवा यांचे नववे वंशज महेंद्र पेशवा यांचे कोरोनाने निधन

पुणे : श्रीमंत बाजीराव पेशवा यांचे नववे वंशज श्रीमंत महेंद्र पेशवा (वय ५८) यांचे मंगळवारी कोरोनामुळे निधन झाले. महेंद्र पेशवा यांच्यामागे आई, पत्नी आणि मुलगी असा परिवार आहे.

काही दिवसांपूर्वी त्यांना कोरोनाचा संसर्ग झाला होता. त्यांच्यावर रुग्णालयात उपचार सुरू होते. उपचारांदरम्यान त्यांची तब्येत खालावल्याने त्यांची प्राणज्योत मालवली. पेशवा घराण्यातील दोन कुटुंबं पुण्यात वास्तव्यास आहेत. त्यातील एक कुटुंब म्हणजे कृष्णराव पेशवा यांचे. त्यांचा मुलगा महेंद्र आणि मुलगी मोहिनी करकरे. ही सर्व मंडळी पेशवा घराण्यातील अमृतराव पेशवा यांची वंशज आहेत.

महेंद्र पेशवा यांचा जन्म १५ ऑक्टोबर १९६३ रोजी झाला. इंजिनिअरिंगची पदवी संपादन केलेल्या महेंद्र यांनी स्वत:चा फॅब्रिकेशनचा व्यवसाय सुरू केला होता. राज्यातील विविध संस्थानिकांच्या परिवारांना एकत्र आणणाऱ्या हिंदवी स्वराज्य महासंघाचे ते कार्याध्यक्ष होते. श्रीमंत बाजीराव पेशवे प्रतिष्ठानमध्ये त्यांचा सक्रिय सहभाग होता. पेशवे यांचा इतिहासाचा अभ्यास होता.