मंचरला पंपचालकाला मारहाण

लोकमत न्यूज नेटवर्क

मंचर: पेट्रोल पंपावर फोनवर बोलू नका असे सांगणाऱ्या पंपमालकालाच तिघांनी शिवीगाळ करत मारहाण केल्याची घटना सोमवारी पेठ (तां.आंबेगाव) येथील आनंद या पेट्रोल पंपावर घडली.

अमर बाळासाहेब शेवाळे (रा. लांडेवाडी), पवन सुधीर थोरात (रा.मंचर), सुमित जालिंदर आढळराव (रा.लांडेवाडी) अशी गुन्हा दाखल झालेल्या आरोपींची नावे आहेत. संतोष बबन धुमाळ यांनी या प्रकरणी फिर्याद दिली आहे. रविवारी सकाळी दहा वाजता संतोष बबन धुमाळ हे पेट्रोल पंपावर आले. दुपारी सव्वा एक वाजता धुमाळ हे पंपावर असताना एका दुचाकीवरून तिघे पेट्रोल टाकण्यासाठी आले. या गाडीला नंबर प्लेट नव्हती. बुलेटमध्ये पेट्रोल टाकण्यासाठी गेले असता त्यातील एक पंपावरच मोबाईलवर बोलत होता. पंपावर फोनवर बोलण्यास बंदी असल्याने धुमाळ यांनी फोनवर बोलणाऱ्यास बोलू नका असे सांगितले. त्यावेळी त्याने अरेरावीच्या भाषा करत तुला माहिती आहे का फोन किती किमतीचा आहे. तू तुझे काम कर असे धुमाळ यांना म्हणाला. त्यावेळी धुमाळ यांनी त्याला पंपावर फोनवर बोलण्यात बंदी आहे. फोनवर बोलल्याने पेट्रोलियम पदार्थांना आग लागण्याची शक्यता असते. असे समजावून सांगत असताना बुलेट वरील दोघेजण खाली उतरले. तिघांनी तुला माहित आहे का मी कोण आहे, असे म्हणत लाथाबुक्क्यांनी मारहाण केली. पंपावर काम करणारे कामगार व मॅनेजर सोडवण्यासाठी आले असता धुमाळ यांना मारण्याची धमकी देत तिघे फरार झाले. पुढील तपास मंचर पोलीस करत आहेत.