एकेरीत मनीष सुरेशकुमारचा उपांत्य फेरीत प्रवेश

अर्जुन कढेचे आव्हान संपुष्टात

पुणे : महाराष्ट्र राज्य लॉन टेनिस संघटना (एमएसएलटीए) व डेक्कन जिमखाना यांच्या संलग्नतेने आयोजित केपीआयटी-एमएसएलटीए आयटीएफ डब्लूटीटी पुरुष टेनिस स्पर्धेत एकेरीच्या उपांत्यपूर्व फेरीत भारताच्या मनीष सुरेशकुमारसह अमेरिकेच्या ऑलिव्हर क्रॉफर्ड व झेन खान, स्वीडनच्या जोनाथन म्रीधा या खेळाडूंनी आपापल्या प्रतिस्पर्ध्यांचा पराभव करून उपांत्य फेरीत प्रवेश केला. तर, एकेरीत अर्जुन कढेला पराभवाचा सामना करावा लागल्याने त्याचे आव्हान संपुष्टात आले.

डेक्कन जिमखाना टेनिस कोर्टवर सुरू असलेल्या या स्पर्धेत एकेरीत उपांत्यपूर्व फेरीत सहाव्या मानांकित भारताच्या मनीष सुरेशकुमार याने पात्रता फेरीतून मुख्य फेरीत प्रवेश केलेल्या ग्रेट ब्रिटनच्या हेन्री पॅटनचा टायब्रेकमध्ये ३-६, ७-६ (३), ६-४ असा पराभव करून दिमाखात उपांत्य फेरीत धडक मारली. हा सामना २ तास ५२ मिनिटे चालला. पहिल्या सेटमध्ये ४-३ अशा फरकाने हेनरी आघाडीवर असताना त्याने मनीषची सर्व्हिस भेदली व स्वतःची सर्व्हिस राखत हा सेट ६-३ असा जिंकून आघाडी घेतली. दुसऱ्या सेटमध्ये मनीषने पुनरागमन करत हा सेट टायब्रेकमध्ये ७-६ (३) असा जिंकून बरोबरी साधली. तिसऱ्या व निर्णायक सेटमध्ये आठव्या गेमपर्यंत दोन्ही खेळाडूंनी सर्व्हिस राखल्या व त्यामुळे सामन्यात ४-४ अशी बरोबरी झाली. अखेर मनीषने हेनरीची नवव्या गेममध्ये सर्व्हिस ब्रेक केली व स्वतःची सर्व्हिस राखत हा सेट ६-४ असा जिंकून उपांत्य फेरीच्या दिशेने पाऊल टाकले.

अमेरिकेच्या चौथ्या मानांकित ऑलिव्हर क्रॉफर्ड याने भारताच्या सातव्या मानांकित अर्जुन कढेचा टायब्रेकमध्ये ६-३, ७-६ (५) असा पराभव करून उपांत्य फेरी गाठली. हा सामना १ तास ४३ मिनिटे चालला. पहिल्या सेटमध्ये ऑलिव्हरने सुरेख सुरुवात करत अर्जुनची तिसऱ्या, पाचव्या गेममध्ये सर्व्हिस रोखली व सामन्यात ४-१ अशी आघाडी घेतली. त्यानंतर पुढच्याच गेममध्ये अर्जुनने ऑलिव्हरची सर्व्हिस भेदून ही आघाडी कमी केली. परंतु आघाडीवर असलेल्या ऑलिव्हरने अर्जुनची सर्व्हिस मोडत नवव्या गेममध्ये पुन्हा सर्व्हिस ब्रेक केली व हा सेट ६-३ असा जिंकला. दुसऱ्या सेटमध्ये अर्जुनने ३-० अशी आघाडी घेतली. पण ऑलिव्हरने जोरदार खेळ करत चौथ्या गेममध्ये अर्जुनची सर्व्हिस रोखली व स्वतःची सर्व्हिस राखत पिछाडी कमी केली. त्यानंतर हा सेट टायब्रेकमध्ये गेला. टायब्रेकमध्ये ५-५ अशी बरोबरी असताना अर्जुनने दुहेरी चूक केली व याचा फायदा घेत ऑलिव्हरने हा सेट ७-६ (५) असा जिंकून विजय मिळवला.

स्वीडनच्या पाचव्या मानांकित जोनाथन म्रीधाने दुसऱ्या मानांकित आर्यलँडच्या सिमॉन कारचा ७-५, २-६, ६-१ असा तीन सेटमध्ये पराभव करून सनसनाटी निकालाची नोंद केली. अमेरिकेच्या आठव्या मानांकित झेन खानने ग्रेट ब्रिटनच्या तिसऱ्या मानांकित एडन म्युकुकचा ४-६, ६-४, ६-० असा पराभव करून उपांत्य फेरीत प्रवेश केला.

दुहेरीत उपांत्य फेरीत स्वित्झर्लंडच्या लुका कॅस्टेलनुव्हो व भारताच्या अर्जुन कढे या जोडीने वाईल्ड कार्डद्वारे प्रवेश केलेल्या अन्वित बेंद्रे व परीक्षित सोमाणी या जोडीचा ६-४, ६-४ असा, तर आर्यलँडच्या सिमॉंन कार व अमेरिकेच्या अलेक्झांडर कोटझेन यांनी अमेरिकेच्या झेन खान व चेक प्रजाकसत्ताकच्या डालिबोर सेव्हर्सिना यांचा ६-४, ३-६, १०-७ असा पराभव करून अंतिम फेरीत प्रवेश केला.

स्पर्धेचा सविस्तर निकाल : उपांत्यपू फेरी : एकेरी : पुरुष :

जोनाथन म्रीधा (स्वीडन) [५] वि.वि. सिमॉन कार (आर्यलँड) [२] ७-५, २-६, ६-१;

झेन खान (अमेरिका) [८] वि.वि. एडन म्युकुक (ग्रेट ब्रिटन) [३] ४-६, ६-४, ६-०;

ऑलिव्हर क्रॉफर्ड (अमेरिका) [४] वि.वि. अर्जुन कढे (भारत) [७] ६-३, ७-६ (५);

मनीष सुरेशकुमार (भारत) [६] वि.वि. हेनरी पॅटन (ग्रेट ब्रिटन) ३-६, ७-६ (३), ६-४;

दुहेरी गट : उपांत्य फेरी :

लुका कॅस्टेलनुव्हो (स्वित्झर्लंड) / अर्जुन कढे (भारत) [२] वि.वि. अन्वित बेंद्रे (भारत) / परीक्षित सोमाणी (भारत) ६-४, ६-४;

सिमॉंन कार (आर्यलँड) / अलेक्झांडर कोटझेन (अमेरिका) वि.वि. झेन खान (अमेरिका) / डालिबोर सेव्हर्सिना (चेक प्रजासत्ताक) ६-४, ३-६, १०-७.

फोटो - मनीष सुरेशकुमार