मनोहर मामा भोसलेला साताऱ्यातून केली अटक

लोकमत न्यूज नेटवर्क

बारामती : कॅन्सर झालेल्या रुग्णास बरा करतो, असे सांगून बारामती शहरातील एकाची २ लाख ५१ हजार ५०० रुपयांची फसवणूक केल्याप्रकरणी फरार असलेल्या मनोहर ऊर्फ मामा भोसले यास पुणे ग्रामीण पोलीस स्थानिक गुन्हे शाखा व बारामती तालुका पोलिसांनी साताऱ्यातून अटक करण्यात आली.

शशीकांत खरात (रा. साठेनगर, कसबा, बारामती) यांनी बारामती ग्रामीण पोलीस ठाण्यात तक्रार दिली आहे. तक्रारदार खरात यांचे वडिलांना थायरॉइड कॅन्सर हा दुर्धर आजार झाला आहे. त्यामुळे खरात हे मनोहरमामा भोसले भोंदूबाबाच्या मौजे सावंतवाडी, गोजूबावी (ता. बारामती) येथील मठामध्ये गेले. त्याने तो बाळूमामा यांचा अवतार असल्याचा बनाव केला. तक्रारदार यांच्या वडिलांचा गळ्यावरील थायरॉइड कॅन्सर बरा करतो, असे सांगून त्यावरील औषध म्हणून बाभळीचा पाला, साखर, भंडारा खाण्यास दिले. तसेच विशाल वाघमारे ऊर्फ नाथबाबा व ओंकार शिंदे यांच्यासोबत संगनमत करून वेळोवेळी चढावा, अभिषेक व भेटीसाठी त्यांच्याकडून एकूण २ लाख ५१ हजार ५०० रुपये त्यांच्या वडिलांच्या जिवाचे बरे वाईट होईल, अशी भीती घालून उकळले. पैसे परत मागितल्यास जिवे मारण्याची धमकी दिल्याची फिर्याद तालुका पोलीस ठाण्यात दाखल आहे.

या प्रकरणातील आरोपींना अटक करण्यासाठी पोलीस मनोहरमामा भोसलेचा शोध घेत होते. आरोपी मनोहरमामा भोसले (रा. उंदरगाव, ता. करमाळा, जि. सोलापूर) यास गुन्हे शाखेच्या अधिकारी आणि स्थानिक पोलिसांनी शुक्रवारी (दि. १०) अटक केली. त्याला बारामती तालुका पोलीस ठाण्यात आणून अटक केली जाणार आहे. उर्वरित विशाल वाघमारे ऊर्फ नाथबाबा, ओंकार शिंदे हे दोघे आरोपी फरार आहेत. फरारी आरोपींना देखील लवकरच अटक करण्यात येईल, त्यांच्या मागावर पोलीस पथके असल्याचे पोलीस निरीक्षक महेश ढवाण यांनी सांगितले.

आरोपींविरुद्ध भारतीय दंड विधान, महाराष्ट्र नरबळी आणि इतर अमानुष, अनिष्ट व अघोरी प्रथा व जादूटोणा प्रतिबंध व उच्चाटण कायदा व औषधे व चमत्कारी उपाय (अक्षेपार्ह जाहिरात) अधिनियमान्वये बारामती तालुका पोलीस स्टेशन पुणे ग्रामीण येथे नोंद करण्यात आला आहे.