बोपोडीत क्रिकेटच्या भांडणातून अल्पवयीन मुलावर कोयत्याने वार

लोकमत न्यूज नेटवर्क

पुणे : क्रिकेट खेळताना झालेल्या भांडणावरून चौघांनी मिळून एका अल्पवयीन मुलावर कोयत्याने वार करून त्याच्या खुनाचा प्रयत्न केला. ही घटना बोपोडी येथील भाऊ पाटील रोडवरील आयटी पार्क समोरील रोडवर मंगळवारी सकाळी ७ वाजता घडली.

याप्रकरणी एका १७ वर्षांच्या मुलाने खडकी पोलिसांकडे फिर्याद दिली आहे. त्यावरून गणेश ऊर्फ घुल्या राजू शेट्टी (वय २६, रा. बोपोडी) आणि अन्य तिघांवर गुन्हा दाखल करण्यात आला आहे.

फिर्यादी मुलगा आणि आरोपी यांच्यामध्ये काही दिवसांपूर्वी क्रिकेट खेळताना वाद झाला होता. त्यानंतर हा अल्पवयीन मुलगा २७ जुलै रोजी सकाळी ७ वाजता आय टी पार्कसमोरील रोडवरील हातगाडीजवळ थांबला होता. त्यावेळी चौघे आरोपी आले. त्यांनी या मुलाला जीवे मारण्याच्या हेतून कोयत्याने वार करुन हाताने मारहाण केली. पोलिसांनी खुनाचा प्रयत्न केल्याचा गुन्हा दाखल केला असून पोलीस उपनिरीक्षक संदीप चव्हाण तपास करीत आहेत.