गेल्या आठ दिवसांपासून बेपत्ता महिलेचा आढळून आला मृतदेह ; पतीपासून राहत होत्या वेगळ्या

कुटुंबीय, नातेवाईक विविध ठिकाणी शोध घेऊनही न सापडल्याने ते बेपत्ता झाल्याची तक्रार वडील अर्जुन बचुटे यांनी लोणी काळभोर पोलीस ठाण्यात दिली होती

लोणी काळभोर : गेल्या आठ दिवसांपासून उरुळी कांचन (ता. हवेली) येथून बेपत्ता असलेल्या महिलेचा मृतदेह शनिवार (१६ जुलै) रोजी दहीटने (ता. दौंड) येथील मुळा मुठा नदी पात्रात मिळून आला आहे. त्यामुळे तिने आत्महत्या केली की तिचा घातपात झाला हे अनुत्तरित आहे. 

सुनिता विलास चौधरी (वय ३४, रा. तुळशीराम नगर, उरुळी कांचन, ता. हवेली) असे मृत महिलेचे नाव आहे. याप्रकरणी तिचे वडील अर्जुन धोंडीबा बचुटे (वय ७३, रा. आंनदनगर, ता. कल्याण, जि. ठाणे) यांनी लोणी काळभोर पोलीस ठाण्यात सुनिता बेपत्ता झाल्याची फिर्याद दिली होती.  

मिळालेल्या माहितीनुसार, उरुळी कांचन ग्रामपंचायत हद्दीतील तुळशीराम नगर परिसरात सुनिता या पतीपासून वेगळ्या राहत होत्या. त्या रविवार (१० जुलै) रोजी घरातून कोणाला काही न सांगता त्या निघून गेल्या होत्या. कुटुंबीय, नातेवाईक विविध ठिकाणी शोध घेऊनही न सापडल्याने ते बेपत्ता झाल्याची तक्रार वडील अर्जुन बचुटे यांनी लोणी काळभोर पोलीस ठाण्यात दिली होती. शनिवार (१६ जुलै) रोजी सुनिता चौधरी यांचा मृतदेह हा दहीटने ग्रामपंचायत हद्दीतील मुळा मुठा नदीच्या पात्रात मिळून आला आहे. पुढील तपास यवत पोलीस करीत आहेत.