हिंदी संदेशाला मनसेने फासले काळे

लोकमत न्यूज नेटवर्क

पुणे : मनसेकडून सातत्याने मराठीच्या मुद्द्यांवरून आवाज उठविला जातो. याच खळखट्याक आंदोलने, मोर्चे यांच्यासह ‘मनसे’ने अमराठी कंपन्यांना धडा शिकवला आहे. याच धर्तीवर पुण्यातील कोथरूडमधील कर्वेनगर चौकातील कै. नानासाहेब बराटे उड्डाणपुलाला सुशोभीकरणाच्या नावाखाली हिंदी भाषेत संदेश लिहिण्यात आले आहेत. याविरुद्ध कोथरूड विभाग मनसेने आवाज उठवत गुरुवारी (दि.११) आंदोलन केले. यावेळी कर्वेनगर येथील उड्डाणपुलाला काळे फासून निषेध करण्यात आला.

शहरात विविध ठिकाणी सुशोभीकरणाचे काम सुरू आहे. मात्र सुशोभीकरणाच्या दरम्यान मराठी भाषेकडे दुर्लक्ष केले जात असल्याचा आरोप करण्यात येत आहे. याच पार्श्वभूमीवर गुरुवारी मनसेच्या कार्यकर्त्यांनी एकत्र येत कर्वेनगर उड्डाणपुलाच्या इथे आंदोलन केले. यावेळी मनसेचे पदाधिकारी व कार्यकर्ते उपस्थित होते.

मनसेचे कोथरूड विभाग अध्यक्ष सुधीर धावडे म्हणाले की, मनपाने हिंदी भाषा कामकाजात अधिकृतपणे वापरण्याचा एखादा नवा कायदा केला आहे? का? की हळूहळू हिंदी भाषा किंवा इतर कोणतीही परप्रांतीय भाषा पुणेकरांच्या माथी मारून ती मनावर बिंबवण्याचा कावा सत्ताधाऱ्यांनी आखला आहे? एक तर हिंदी त्यात अशुद्ध हिंदी. परंतु महाराष्ट्र नवनिर्माण सेना हे कधीही सहन करणार नाही. पुणेकरांवर जबरदस्तीने लादलेल्या हिंदी भाषेचा आम्ही जाहीर विरोध करतो व निषेधही करतो.