कोयत्याने वार करून टोळक्याने तरुणाचा केला खुनाचा प्रयत्न

लोकमत न्यूज नेटवर्क

पुणे : पैसे न देता खाद्यपदार्थ घेऊन जात असताना विरोध केलेल्या सोनू शेखचा शोध घेत असलेल्या टोळक्याने दुसऱ्या तरुणावर कोयत्याने वार केले. या हल्ल्यात तरुण गंभीर जखमी झाला आहे.

याप्रकरणी स्वारगेट पोलिसांनी सहा जणांवर खुनाचा प्रयत्न केल्याचा गुन्हा दाखल केला असून सराईत गुन्हेगाराला अटक केली आहे.

गोविंदसिंग पापुलसिंग टाक (वय २८, रा. डायस प्लॉट, गुलटेकडी) असे या गुन्हेगाराचे नाव आहे.

याप्रकरणी उझेर हसीन खान (वय १९, रा. डायस प्लॉट, गुलटेकडी) यांनी फिर्याद दिली आहे. खान यांचे गुलटेकडीत रब्बानी केटरर्स हे दुकान आहे. गोविंदसिंग टाक हा पैसे न देता त्यांच्या दुकानातील खाद्यपदार्थाचे भांडे घेऊन जात होता. त्याला सोनू शेख याने विरोध केला. या कारणावरून २७ जुलै रोजी रात्री ९ वाजता टाक इतर पाच साथीदारांना घेऊन आला. त्याने हातात कोयते व पालघन हवेत फिरवून परिसरात दहशत पसरविली. फिर्यादी व त्यांचा नातेवाईक साहिल शेख हा त्यांना पाहून पळून जाऊ लागले. तेव्हा टाक याने त्यांना अडवून त्यांच्या डोक्यात वार करण्याचा प्रयत्न केला. मात्र, तो चुकला. ते पाहून साहिल पळून जाऊ लागल्यावर टाक याने त्याच्या पाठीवर कोयत्याने वार केले. त्यानंतर टाक याने त्याचा पाठलाग केला. तेव्हा फिर्यादी हे अंधारात टपरीखाली लपून बसले व साहिल आत गल्लीमध्ये पळत गेला. त्यानंतर गोविंदसिंग टाक याने परिसरात दहशत माजवण्याचा प्रयत्न केला. सहायक पोलीस निरीखक ए. के़ रसाळ पुढील तपास करीत आहेत.