उपनगरांमध्ये वाढताहेत सर्वाधिक रुग्ण

पुणे : शहरातील कोरोनाबाधितांची संख्या मागील दोन आठवड्यांपासून झपाट्याने वाढत चालली आहे. मागील डिसेंपासूनची ही सर्वाधिक वाढ नमूद करण्यात आली आहे. साधारणपणे ७ फेब्रुवारीपासूनच्या आकडेवारीवरुन उपनगरांमध्ये सर्वाधिक रुग्ण वाढत असल्याचे समोर आले आहे. विशेषत: हडपसर-मुंढवा, सिंहगड रस्ता, वारजे-कर्वेनगर, धनकवडी-सहकारनगर, बिबवेवाडी, औंध-बाणेर या क्षेत्रीय कार्यालयांच्या हद्दीत सर्वाधिक रुग्ण आढळून आले आहेत.

शहरात कोरोनाचा शिरकाव झाल्यानंतर सुरुवातीच्या काळात शहराच्या मध्यवस्तीमध्ये कोरोनाचे रुग्ण वाढले. त्यानंतर हा संसर्ग हळूहळू उपनगरांमध्ये वाढत गेला. या काळात सर्वाधिक रुग्ण भवानी पेठेमध्ये आढळून येत होते. त्याखालोखाल ढोले पाटील रस्ता, ताडीवाला रोड आदी परिसर होता. परंतु, प्रशासनाच्या उपाययोजना आणि नागरिकांनी त्याला दिलेला प्रतिसाद यामुळे या भागातील रुग्णसंख्या कमी झाली होती.

मागील दोन आठवड्यांत झपाट्याने रुग्णवाढ होत चालली आहे. मात्र, ही रुग्णवाढ उपनगरांमध्ये अधिक होत असून भवानी पेठ क्षेत्रीय कार्यालयाच्या हद्दीमध्ये सर्वात कमी रुग्णवाढ नोंदविण्यात आली आहे. तर सर्वाधिक वाढ हडपसर-मुंढवा क्षेत्रीय कार्यालयाच्या हद्दीमध्ये नोंदविण्यात आलेली आहे. उपनगरांमध्ये खबरदारी बाळगण्यात होत असलेली ढिलाई, पोलीस-पालिकेकडून कारवाई करण्याकडे होत असलेले दुर्लक्ष, व्यापारी आस्थापनांमध्ये धुडकावले जाणारे सुरक्षा नियम यामुळे कोरोना वाढीस हातभार लागत आहे.

====

क्षेत्रीय कार्यालय २३ फेब्रुवारी ७ फेब्रुवारीपासूनची वाढ

हडपसर-मुंढवा 91 659

सिंहगड रस्ता 54 488

वारजे-कर्वेनगर 71 476

धनकवडी-सहकारनगर 61 475

बिबवेवाडी 59 430

नगर रस्ता- वडगाव शेरी 31 421

औंध-बाणेर 63 404

कोथरुड-बावधन 62 395

कसबा-विश्रामबाग 51 320

कोंढवा-येवलेवाडी 29 276

येरवडा-कळस 17 248

ढोले पाटील 24 188

शिवाजीनगर-घोलेरस्ता 18 182

वानवडी-रामटेकडी 11 166

भवानी पेठ 19 136