जडीबुटी औषध निर्मिती करणाऱ्या मुलाकडून जन्मदात्या वडीलांचा खून

वडील आणि मुलगा दारूच्या नशेत असल्याने किरकोळ मारहाणीत घडला हा प्रकार

केडगाव : पारगाव तालुका दौंड येथे जडीबुटी औषध निर्मिती करणाऱ्या मुलाने जन्मदात्या वडीलांचा खून केला. सदर घटना मंगळवार दिनांक २ रोजी मध्यरात्रीच्या सुमारास घडली. पारगाव तालुका दौंड येथील मुख्य चौकांमध्ये सदर जडीबुटी निर्मिती करणारे कुटुंब राहत होते.

गेल्या अनेक वर्षापासून जडीबुटी विकण्याचा व्यवसाय हे कुटुंब करत होते. यामध्ये वडील रतनसिंह नुरसिंह चितोडिया (वय ६९, सध्या रा.पारगाव, तालुका दौंड ) यांनी आपला मुलगा अजय रतनसिह चितोडिया (वय ४० वर्ष रा. पारगाव ,तालुका दौंड) याला पैसे मागितले.

परंतु मुलाने पैसे देण्यात नकार दिला. दोघे दारूच्या नशेत असल्याने वडिलांनी मुलाला किरकोळ मारहाण केली. त्यानंतर मध्यरात्रीच्या सुमारास मुलाने वडिलांना पुन्हा लाकडाच्या साहाय्याने मारहाण केली. यामध्ये वडिलांचा जागीच मृत्यू झाला. घटनास्थळी पोलिस निरीक्षक नारायण पवार, पोलीस उपनिरीक्षक पद्मराज गंपले यांनी भेट दिली. रात्री उशिरापर्यंत गुन्हा नोंदविण्याचे काम चालू होते.