जेजुरीत किरकोळ वादातून खून

जेजुरी : बारमध्ये दारू पिताना मित्रांच्या बाचाबाचीतून एकाचा खून झाल्याची घटना जेजुरीत शनिवारी उघडकीस आली. पोलिसांनी रातोरात एका आरोपीस अटक केली आहे तर दुसरा फरार झाला आहे.

पोलिसांनी दिलेल्या माहितीनुसार प्रसाद मल्हारी दळवी (वय ४१) असे खून झालेल्या व्यक्तीचे नाव आहे. तर अमर घोरपडे आणि निरंजन पवार असे आरोपींची नावे आहेत.

पोलिसांनी दिलेल्या माहितीनुसार जेजुरीतील महाद्वार पथावर प्रसाद मल्हारी दळवी याचे केशकर्तनालय आहे. प्रसाद शुक्रवारी रात्री.९.३० वाजता दुकान बंद करून अमर घोरपडे, निरंजन पवार या मित्रांबरोबर येथील एका बारमध्ये दारू पिण्यासाठी गेला होता. दारू पिताना त्यांची बाचाबाची झाली. बार मधील इतरांनी त्यांचे भांडण सोडवले. मात्र, त्यानंतर १२ वाजता आरोपींनी प्रसाद याच्या घरी जाऊन वाद घातला. तेथून त्याला होळकर तलाव येथे घेऊन गेले. तेथे दळवी याच्या डोक्यात दगड घालून खून केला. पुरावा नष्ट करण्यासाठी मृतदेह तलावात फेकून दिला. ही घटना जेजुरी पोलिसांना समजल्यानंतर त्यांनी बार मधील सीसीटीव्ही फुटेज तपासल्यानंतर आरोपींची ओळख पटवली. घटनास्थळी जाऊन गुन्ह्यासाठी वापरलेली दुचाकी जप्त केली तर स्थानिकांच्या मदतीने मृतदेह तलावाबाहेर काढला. पोलिसांनी दोन्ही आरोपीना त्यांच्या घरून ताब्यात घेण्याचा प्रयत्न केला. यात निरंजन उर्फ गोट्या प्रदीप पवार याला अटक केली. तर दुसरा आरोपी अमर घोरपडे हा फरार झाला आहे. पुढील तपास पोलिस निरीक्षक सुनील महाडिक करीत आहेत.

फोटो मेल केला आहे मयत प्रसाद दळवी