कुरकुंडी येथे ज्येष्ठ महिलेचा खून

चाकण : कुरकुंडी (ता. खेड) येथील ज्येष्ठ महिलेचा तिच्या राहत्या घरी डोक्यावर आणि चेहऱ्यावर कठीण वस्तूचा प्रहार करून खून केल्याची धक्कादायक घटना सोमवारी (दि. २४) दुपारी घडली.

सखुबाई बबन राऊत (वय ७०, रा. कुरकुंडी, ता. खेड, जि. पुणे) असे हत्या झालेल्या महिलेचे नाव आहे. घटनास्थळी चाकण पोलीस ठाण्याचे वरिष्ठ निरीक्षक अशोक राजपूत व अन्य वरिष्ठ पोलीस अधिकारी दाखल झाले. त्यानंतर काही संशयितांना ताब्यात घेण्यात आले आहे. त्यांना पाईट पोलीस चौकी येथे चौकशीसाठी नेण्यात आले आहे. उशिरापर्यंत संबंधितांची चौकशी सुरू होती. खून झालेल्या महिलेचा मृतदेह ताब्यात घेऊन शवविच्छेदन व उत्तरीय तपासणीसाठी रात्री उशिरा पाठवण्यात आला आहे. या धक्कादायक घटनेने कुरकुंडी गावात एकच खळबळ उडाली आहे.

ही ज्येष्ठ महिला घरी एकटीच राहत होती. त्यांच्या घराजवळील अन्य दोन घरे देखील बंदच आहेत. याप्रकरणी रात्री उशिरापर्यंत याबाबत गुन्हा दाखल करण्याची कार्यवाही सुरू होती.

फोटो : कुरकुंडी (ता. खेड) येथील घटनास्थळ; इन्सेट मध्ये सखुबाई बबन राऊत.